Ularda rekonstruksiya ishlari sifatsiz holda amalga oshirilayotgani aniqlangan.

Samarqand viloyati Urgut tumani hududidagi qator ijtimoiy soha obyektlarida qurilish me’yorlariga rioya qilinmasligi, texnika xavfsizligi talablarining buzilishi kabi holatlar aniqlandi. Bu haqida viloyat hududiy Qurilish va uy-joy kommunal nazorat inspeksiyasi xabar berdi.

Qayd etilishicha, tumanning “Do‘stlik” mahallasidagi 142-sonli maktabni rekonstruksiya qilish jarayonida xususiy korxona tomonidan olib borilayotgan qurilishda binoning ikkinchi qavatida terilayotgan g‘ishtlarning vertikal va gorizontal choklari qorishma bilan to‘liq to‘ldirilmagani, loyiha bo‘yicha ko‘zda tutilgan SG-1 setkalar umuman qo‘yilmagani aniqlangan. Bundan tashqari, obyektga olib kelingan qurilish materiallarini saqlash uchun maxsus omborxonalar tashkil qilinmagan. Kamchiliklar bo‘yicha demontaj ishlari amalga oshirilgan.

Shuningdek, “Terak” mahallasida joylashgan 73-sonli maktabni rekonstruksiya qilish ishlarini olib borayotgan MChJ tomonidan ham o‘xshash kamchiliklarga yo‘l qo‘yilgan. Jumladan, g‘ishtlar orasidagi choklar sifatsiz to‘ldirilgan, SG-1 setkalar o‘rnatilmagan, shuningdek, qurilish maydonida yuritilishi lozim bo‘lgan ijro hujjatlari to‘liq yuritilmagan. Aniqlangan qoidabuzarliklar yuzasidan Inspeksiya tomonidan tegishli ko‘rsatmalar berilib, sifatsiz ishlar buzdirilgan.

“Mo‘minobod” mahallasidagi 92-sonli maktabda esa obyektga olib kelingan qurilish materiallari ochiq holda saqlanmoqda, maxsus omborxonalar tashkil qilinmagan. Shuningdek, binoning ba’zi joylarida bajarilgan temir-beton o‘zaklar loyiha talablari asosida bajarilmagan, obyekt hududi qurilish chiqindilaridan tozalanmagan.

“Yuqoridagi qoidabuzarliklarni bartaraf etish bo‘yicha inspeksiya tomonidan mas’ullarga bajarilishi majburiy bo‘lgan ko‘rsatmalar berilib, ularning ijrosi qat’iy nazoratga olindi”, – deyiladi xabarda.

• Maktab
• Samarqand
• qurilish