2025/2026-o‘quv yili uchun abituriyentlarni ro‘yxatga olish 5-iyundan 25-iyungacha onlayn tarzda amalga oshirildi. Bu davr mobaynida respublika bo‘yicha jami 671 397 nafar abituriyent ro‘yxatdan o‘tdi. Shundan 426 685 nafari (63,6 %) joriy yil bitiruvchilari, 244 712 nafari (36,4 %) esa oldingi yillar bitiruvchilari hisoblanadi.

Abituriyentlarning 53,8 foizini (361 019 nafar) xotin-qizlar, 46,2 foizini (310 378 nafar) erkaklar tashkil etdi.

Alohida iqtidor talab etiladigan yo‘nalishlarga 39 307 nafar abituriyent hujjat topshirdi.

Ro‘yxatdan o‘tish jarayonida taqdim etilgan xalqaro sertifikatlar tizimli ravishda ko‘rib chiqildi. Natijada 18 854 ta sertifikat haqiqiy deb topildi va tan olindi. 3 370 ta sertifikat esa belgilangan talabga javob bermagani sababli rad etildi.

Joriy yilda barcha fanlardan milliy yoki xalqaro sertifikatga ega bo‘lgan 678 nafar abituriyent test sinovlaridan ozod qilinib, bevosita tanlov bosqichiga o‘tkazildi. 2024-yilda bunday imkoniyatdan atigi 1 nafar abituriyent foydalangan edi.

85 140 nafar abituriyent umumta’lim fanlaridan, 58 216 nafari esa chet tillaridan milliy yoki xalqaro sertifikatga ega ekani aniqlandi. Bu ko‘rsatkichlar 2024-yilda mos ravishda 13 180 va 44 834 nafarni tashkil etgan.

Joriy yildan boshlab fanlar majmuasida chet tili birinchi fan sifatida belgilangan yo‘nalishlarga faqat til sertifikatiga ega abituriyentlar qabul qilinmoqda. Bu talablarga mos kelgan abituriyentlar soni 22 041 nafarga yetdi.

Test sinovlarining ochiq va shaffof o‘tishini ta’minlash uchun 3 mingdan ortiq jamoatchilik vakillari guruh nazoratchilari sifatida jalb qilindi. Shuningdek, eshitish va nutqida nuqsoni bo‘lgan abituriyentlar uchun 100 nafarga yaqin surdotarjimon ishtirok etadi.

Test sinovlari 14–23 iyul kunlari ikki smenada o‘tkaziladi. 65 ta katta sig‘imli bino tanlab olingan bo‘lib, har kuni ikki smenada 70 140 nafargacha abituriyent test sinovlaridan o‘tadi.

Kasbiy (ijodiy) imtihonlar 7-iyuldan boshlab 52 ta oliy ta’lim muassasasida o‘tkazilmoqda. Imtihon sanasi, vaqti va manzili haqidagi ma’lumotlar abituriyentlarning my.uzbmb.uz saytidagi shaxsiy kabinetlariga yuborilgan. Ulardan imtihon boshlanishidan bir soat oldin belgilangan joyga kelish so‘raladi.

2025/2026-o‘quv yili uchun akademik litseylarga hujjat topshirish 10-iyul kuni yakunlandi. Umumta’lim maktablarining 9-sinf bitiruvchilaridan hujjatlar my.edu.uz portali orqali onlayn qabul qilindi. Hozirgacha 49 mingdan ortiq ariza qabul qilingan.

Bitiruvchilar texnikumlar qabuliga ham shu portal orqali bir vaqtning o‘zida ro‘yxatdan o‘tish imkoniyatiga ega bo‘lishdi. Bu ularning alternativ ta’lim yo‘nalishini tanlashlariga sharoit yaratdi. Texnikumlarga ro‘yxatdan o‘tish 20-iyulgacha davom etadi. Ayni paytgacha 135 mingdan ortiq abituriyent texnikumlarga hujjat topshirgan.

Magistratura mutaxassisliklariga hujjat topshirish my.edu.uz platformasi orqali 30-iyulgacha amalga oshiriladi. Tanlovda milliy yoki xalqaro til sertifikatiga ega bo‘lganlar ishtirok etishi mumkin.

Xorijiy oliy ta’lim muassasalari bitiruvchilari uchun diplomlar kech taqdim etilishini inobatga olgan holda, ularga akademik ma’lumotnoma va transkript asosida ariza topshirishga ruxsat berildi.

Ijtimoiy himoyaga muhtoj toifadagi abituriyentlar, xususan, ko‘zi ojizlar uchun magistraturaga kirishda alohida tartib joriy qilindi. Ular uchun til sertifikati talabi bekor qilinadi. Agar bakalavr diplomidagi o‘rtacha ball 100 ballik tizimda 71 yoki undan yuqori, 5 ballik tizimda esa 4 yoki undan yuqori bo‘lsa, ular qo‘shimcha davlat granti asosida qabul qilinadi.

• Matbuot anjumani
• Sertifikat
• Test to‘lovi
• abituriyent