O‘zbekiston Respublikasi Prezidenti Shavkat Mirziyoyev oila a’zolari bilan birgalikda Mirzo Ulug‘bek tumanidagi 162-saylov uchastkasiga tashrif buyurib, ovoz berishda ishtirok etdi.

Bugun, 22-dekabr kuni O‘zbekiston Respublikasi Oliy Majlisi va xalq deputatlari Kengashlariga saylovlar bo‘lib o‘tmoqda.

O‘zbekiston davlat rahbari Mirzo Ulug‘bek tumanidagi 162-saylov uchastkasida ovoz berdi va o‘zi kabi u yerga ovoz berish uchun kelgan odamlar bilan suhbatlashdi, birgalikda suratlarga tushdi. Birinchi marta ovoz bergan yoshlar, ota-onasi bilan kelgan bolalarning o‘qishlariga rivoj tiladi. 

Nuroniylar mamlakatiga tinchlik-farovonlik, Prezidentimizga sog‘lik-omonlik tilab duolar qildi. 
Prezident Shavkat Mirziyoyev xorijiy kuzatuvchilar, ommaviy axborot vositalari vakillari bilan ham muloqot qildi. Ular saylovlar ochiq, yuksak saviyada o‘tayotganini, aholining ijtimoiy-siyosiy faolligi oshganini ta’kidladi. 

Eslatib o‘tamiz, saylov jarayonini kuzatishda MDH, ShHT, YeTTB, Xalqaro xususiy huquq bo‘yicha Gaaga konferensiyasi, Turkiy kengash, TurkPA, shuningdek, YeXHT Demokratik institutlar va inson huquqlari bo‘yicha byurosining to‘laqonli missiyasi tarkibida 700 nafardan ziyod xorijiy va xalqaro kuzatuvchilar ishtirok etmoqda.