O‘zbekiston Energetika vazirligida joriy yil 15-noyabr kuni Osiyo taraqqiyot banki (OTB) Markaziy va Gʻarbiy Osiyo Departamenti Energetika bo‘limi direktori Ashok Bxargava bilan uchrashuv o‘tkazildi. Bu haqida Vazirlikning telegram kanali ma’lum qilmoqda.

Uchrashuvda qayta tiklanuvchi energiya manbalarini rivojlantirish istiqbollari hamda o‘tkazuvchi tarmoqlarni rivojlantirish va modernizasiya qilishning kelgusi rejalari muhokama qilindi. Xususan, Surxon-Puli-Xumri yuqori voltli elektr uzatish liniyalarini qurish loyihasining holati muhokama etildi.

Shuningdek, tomonlar OTB’dan qarz olish asosida respublika energetika sektorida olib borilayotgan islohotlarni amalga oshirish bo‘yicha tadbirlarni moliyalashtirish imkoniyatlarini muhokama qildi.

O‘zbekiston yoqilg‘i-energetika majmuasini rivojlantirish uchun islohotlarga texnik ko‘mak ko‘rsatishda namoyon bo‘lgan OTB faoliyatining xalqaro tajribasi muhim ahamiyat kasb etadi. Xususan, OTB ko‘magida Surxondaryo viloyatida 100 MV quvvatli fotoelektrik stansiyasini qurish, boshqarish va unga egalik qilish loyihasiga xususiy investorni saralash bo‘yicha xalqaro tanlov tashkil etiladi. Maslahat xizmatlarini ko‘rsatish bo‘yicha tegishli kelishuv 2019-yil avgust oyida Energetika vazirligi, Davlat-xususiy sherikchilikni (DXSh) rivojlantirish agentligi va OTB o‘rtasida imzolangan.

Tender g‘olibi 2020-yil iyunda e’lon qilinishi kutilmoqda, qurilish 2020-yil dekabr oyiga rejalashtirilgan bo‘lib, bir yildan so‘ng yakuniga yetadi. 2021-yilning yozida stansiyaning birinchi quvvatlarini ishga tushirish ko‘zda tutilmoqda. 

Investitsiyalarning hajmi taxminan 100 mln. AQSh dollarini tashkil etib, ular investor uchun sekin-asta elektr energiyasini yetkazib berish uchun oylik hisoblar orqali qoplanadi.  

Shuningdek, OTBning moliyaviy ko‘magida “Taxiatosh IES — “Xorazm” PS — Sarimoy aholi punkti(Xorazm viloyati) yo‘nalishida 220 kV.li elektr uzatish liniyalarini qurish” loyihasi amalga oshiriladi. Loyihaning umumiy qiymati 258,5 mln. AQSh dollarini tashkil etib, ulardan 150 mln. AQSh dollari OTBdan olingan qarz hisoblanadi.

Shuningdek, Osiyo taraqqiyot banki bilan O‘zbekiston gaz-transport tizimini modernizatsiya qilish sohasida loyihalarni ishlab chiqish hamda OTB tomonidan mintaqalararo hamkorlikni rivojlantirishda ko‘mak ko‘rsatish bo‘yicha kelishuvga erishildi.