Абдулла Орипов – Ўзбекистон қаҳрамони унвони соҳиби, ўзбек шоири, таржимони ва жамоат арбоби. ХХ аср ўзбек адабиёти ва шеъриятининг таниқли вакили ҳамда Ўзбекистон Республикасининг Давлат мадҳияси матни муаллифи.

Абдулла Орипов 1941 йилнинг 21 мартида Қашқадарё вилояти, Косон туманидаги Некўз қишлоғида туғилди. Қишлоқ Қўнғиртов этагида жойлашган. Отаси Орифбой Убайдулла ўғли жамоа хўжалиги раиси бўлган. Онаси Турдихол уй бекаси бўлган. Оилада тўрт ўғил, тўрт қиз бўлиб, Абдулла ўғилларнинг кенжаси эди.

1958 йилда ўрта мактабни олтин медаль билан тамомлагач, Тошкент давлат университети ўзбек филологияси факультетининг журналистика йўналишига ўқишга кириб, олийгоҳни ҳам 1963 йилда имтиёзли диплом билан якунлади.

Университетдан сўнг, 1963-1967 йилларда “Ёш гвардия” нашриётида муҳаррир, 1974-1976 йилларда “Шарқ юлдузи” журнали бўлим мудири; 1976-1982 йилларда Ўзбекистон Ёзувчилар уюшмаси адабий маслаҳатчиси, 1982-1983 йилларда уюшманинг Тошкент вилояти бўлими масъул котиби, 1983-1985 йилларда “Гулхан” журнали бош муҳаррири, 1985-1996 йилларда Ёзувчилар уюшмаси масъул котиби, 1996-2009 йилларда Ўзбекистон Ёзувчилар уюшмаси раиси ва бир вақтнинг ўзида Ўзбекистон Республикаси Муаллифлик ҳуқуқини ҳимоя қилиш давлат агентлиги раиси лавозимларида фаолият юритди.

2009 йилдан умрининг охиригача Ўзбекистон Ёзувчилар уюшмаси фахрий раиси лавозимини эгаллаган. Абдулла Орипов 1990 йилда Ўзбекистон Олий Кенгаши, 1995 йилда Ўзбекистон Олий Мажлиси депутатлигига сайланди. 2005 йилда Сенат аъзоси этиб тайинланган.

Абдулла Орипов 2016 йилнинг 5 октябрида узоқ вақт давомидаги касалликдан сўнг, АҚШнинг Техас штатида вафот этди.

• Адабиёт