Маҳаллий нашрларнинг хабар беришича, Рио-де-Жанейро шаҳри йўллари баррикадалар ва ўғирланган автобуслар билан тўсилган. Хавфсизлик кучлари жиноятчиларга қарши 2,5 минг нафар аскарни сафарбар этган. Гиёҳванд моддалар савдосининг 70 фоизини назорат қилувчи жиноий тўдалар кенг кўламли полиция операциясига жавобан локдаун эълон қилишган.

Шаҳарнинг шимолий қисмида тартибсизлик ҳукм сурмоқда: отишмалар, ёнаётган машиналар, аҳоли уйдан чиқишга қўрқмоқда. Картеллар ҳудудларни тўсиш учун ФПВ-дронларидан фойдаланмоқда.

Маълумотларга кўра, Рио-де-Жанейрода ўтказилган “Тўхтатиш” операцияси давомида наркомафиянинг 60 нафар аъзоси йўқ қилинган. Тўрт нафар полициячи ҳалок бўлган, 15 нафари яраланган, тўрт нафар фуқаро жароҳат олган. 80 дан ортиқ гумонланувчи қўлга олинган, 93 та қурол мусодара қилинган.

Операцияда дронлар, вертолётлар ва зирҳли техникалар ҳам жалб қилинган. Шунингдек, губернатор Клаудио Кастро операцияга мамлакат Қуролли кучларини жалб этишга чақирмоқда.

• Braziliya
• Отишма
• Қуролли Кучлар