“Ғишткўприк” чегара божхона постида 3 метрлик илонни олиб киришга уриниш фош қилинди. Бу ҳақда Божхона қўмитаси хабар қилди.

Унга кўра, “Ғишткўприк” чегара божхона постида қўшни давлатдан кириб келган пиёдага тегишли қўл сумкаси назорат-рентген ускунаси орқали кўздан кечирилганида, унинг ичида божхона ходимларининг оғзаки сўровида ва йўловчи божхона декларациясида маълум қилинмаган 1 бош илон борлиги аниқланган.

3 метр узунликдаги мазкур илон дастлабки маълумотларга кўра, йўлбарссимон албинос бўғма илони бўлиб, асосан Жанубий ва Жанубий-шарқий Осиёда яшайди.

Халқаро Қизил китобга киритилганлиги сабабли мазкур жониворни Ўзбекистон олиб киришда халқаро CITIES рухсатномаси талаб этилади. Аммо, юқоридаги ҳолатда йўловчи бу каби ҳужжатларни божхона ходимларига тақдим қила олмаган.

Шу боис, ҳолат юзасидан божхона органлари томонидан суриштирув ҳаракатлари давом эттирилаётгани маълум қилинди.

Шунингдек, илон Тошкент ҳайвонот боғига топширилган бўлиб, мутахассислар унинг ҳолатини барқарор деб баҳолашмоқда.

• Чегара
• ilon