Кеча, 26 октябрь куни Эрондаги Шоҳ-Черак мақбараси (Шeроз) яқинида содир этилган теракт оқибатида камида 15 киши ҳалок бўлди. Бу ҳақда “Фарс” нашри хабар бермоқда.

Маълум қилинишича, маҳаллий вақт билан соат 17:45 да уч нафар қуролланган номаълум шахс Шоҳ-Черак мақбарасига ҳужум қилган. Қуролли ҳужум натижасида, маҳаллий ОАВ маълумотларига кўра, камида 15 нафар тинч аҳоли ҳалок бўлган. 40 га яқин киши жароҳатланган. Журналистлар ҳалок бўлганлар орасида ёш бола ҳам борлигини таъкидламоқда.

Ҳозирча жиноий гуруҳларнинг ҳеч бири ҳужум учун жавобгарликни ўз зиммасига олмаган.

Полиция икки террорчини ҳибсга олган ва учинчисини қидириш давом этмоқда. Маҳаллий ҳукумат вазият назорат остида эканини айтмоқда.

Қайд этиш мумкин, Шоҳ-Черак мақбараси ХIV асрда қурилган. Мақбара номи форсча “Нур Раббий” деган маънони англатади, унинг ичи ноёб ойна мозаикаси билан безатилган.

Шунингдек, мақбара масжид сифатида ишлатилади ва шиа мусулмонларининг зиёратгоҳи ҳисобланади.

• Eron
• Maqbara
• Отишма
• Теракт