Давлат хавфсизлик хизмати хабарига кўра, Тошкент шаҳрида Telegram’ мессенжери орқали гиёҳвандлик моддаларини сотаётган шахслар қўлга олинди.

Маълум қилинишича, Учтепада яшовчи 2000 йилда туғилган фуқаро томонидан Telegram’ орқали пойтахт ҳудудида синтетик гиёҳванд моддалар савдоси амалга оширилаётгани аниқланган. ДХХ Тошкент шаҳар бошқармаси ходимлари ва шаҳар ИИББ ҳамкорлигида ўтказилган тезкор тадбир давомида ушбу шахс 225 грамм “Альфа-ПВП” синтетик наркотик моддаси билан қўлга олинган.

Шунингдек, унинг 2005 йилда туғилган таниши ҳам 2 дона “Регапен” кучли таъсир қилувчи дори воситаси билан ушланган. Дастлабки сўровда улар мазкур дорини Мирзо Улуғбек туманидаги дорихоналардан биридан сотиб олганини айтган. Тезкор тадбир давомида ушбу дорихонанинг норасмий сотувчиси 14 дона “Регапен” дори воситасини мижозга 1 миллион 200 минг сўмга сотаётган вақтида қўлга олинган.

Бундан ташқари, дорихонанинг ёрдамчи омборхонасидан тегишли ҳужжатлари бўлмаган 20 200 дона “Габатан”, 823 дона “Регапен”, 100 дона “Галара”, 4 дона “Торгабалин” каби таркибида кучли таъсир қилувчи моддалар мавжуд бўлган дори воситалари ашёвий далил сифатида мусодара қилинган.

Ҳозирда мазкур шахсларга нисбатан Жиноят кодексининг тегишли моддаларига асосан жиноят ишлари қўзғатилган ва уларга “қамоқ” эҳтиёт чораси қўлланган. Жиноий иш юзасидан тергов ҳаракатлари давом этмоқда.

• Жиноят
• Uchtepa