19 январь куни президент томонидан Жиноят, Жиноят-процессуал кодексларига ҳамда Маъмурий жавобгарлик тўғрисидаги кодексига ўзгартириш ва қўшимчалар киритиш тўғрисидаги қонун имзоланди. Унга кўра ушбу ҳуқуқбузарликларни содир этганлар қарийб 7 млн сўмгача жаримага тортилади ҳамда қурилмалари мусодара қилинади. Бу ҳақда Spot.uz хабар берди.

Шунингдек, маъмурий жавобгарлик тўғрисидаги кодексга мобил қурилманинг халқаро ўзига хос идентификация кодини (IMEI) ёки абонент қурилмасининг идентификатциялаш модулини қонунга хилоф равишда ўзгартириш бўйича жавобгарликни белгиловчи модда киритилган.

Кодекснинг 155-3-моддаси билан IMEI кодни ишлаб чиқарувчининг рухсатисиз ўзгартириш, шунингдек бу мақсадда махсус дастурларни ишлаб чиқиш, тарқатиш ёки улардан фойдаланиш БҲМнинг 15 баробаридан (5,1 млн сўм) 20 баробаригача (6,8 млн сўм) миқдорда жарима солишга сабаб бўлади.

Шунингдек, абонент қурилмасининг идентификатциялаш модулини қонуний ишлаб чиқарувчининг ёки унинг қонуний эгасининг рухсатисиз ўзгартириш ёки унинг нусхасини яратиш БҲМнинг 20 баробаригача жарима солишга сабаб бўлади.

Бунда, юқоридаги ҳар икки ҳолатда ҳуқуқбузарлик содир этилган қурилма мусодара қилинади. Мазкур ўзгартиришлар қонун кучга кирган кундан уч ой ўтгач амалга киритилади.

2023 йилнинг февралида Тошкент шаҳар ИИББ Ўзбекистонда мобил қурилмаларнинг идентификация кодларини (IMEI) рухсатсиз ўзгартирганлик учун жиноий жавобгарликка тортиш юзасидан тегишли нормаларга ўзгартиришлар киритиш бўйича қонун лойиҳаси ишлаб чиқилаётганини маълум қилганди.

• Ҳуқуқбузарлик
• Жарима
• Қонун