Тошкентдаги амалдаги Ислом Каримов номидаги халқаро аэропорт ёки “Тошкент-Жанубий” аэропорти 2030 йилдан кейин ўз фаолиятини тўхтатиши мумкин. Бу ҳақда транспорт вазирининг ўринбосари Жасурбек Чориев Spot нашрига берган интервьюсида маълум қилган.

Вазир ўринбосарининг сўзларига кўра, аэропорт ҳозирча ишлашда давом этади, чунки унинг имкониятлари тўлиқ ишлатилмаган. Бироқ “принципиал қарор” қабул қилинган ва янги аэропортга ўтиш жараёни 2030 йилдан сўнг амалга оширилади.

Чориевнинг таъкидлашича, пойтахтдаги аҳоли ва транспорт оқими ортиб бормоқда. Йўловчилар замонавий ва қулай инфратузилмани талаб қилмоқда. Янги аэропорт бу эҳтиёжларга жавоб бериши кутиляпти. Шу боис, давлат хусусий шерикчилик билан янги аэропорт қуриш шартномасини тузган ва инвесторнинг талабига кўра, келгусида барча авиакомпаниялар янги манзилга кўчади.

Янги аэропорт Тошкент вилояти ҳудудида қурилмоқда. Лойиҳада Саудия Арабистонининг Vision Invest (45 фоиз), Япониянинг Sojitz (30 фоиз), Жанубий Кореянинг Incheon International Airport (15 фоиз) ва Uzbekistan Airports (10 фоиз) улуш билан иштирок этмоқда.

Аэропорт йилига 20 млн йўловчи ва 129 минг тонна юк қабул қилишга қодир бўлади. Ҳар соат 30 та парвозни қабул қилиб, 62 та самолётни бир вақтнинг ўзида жойлаштириши мумкин. Янги аэропорт Тошкент–Самарқанд, Тошкент–Андижон ва Тошкент–Бўстонлиқ тезюрар йўллари ҳамда Янги Тошкент билан боғланади.

Янги комплексда тезюрар поездлар учун темирйўл вокзали ва Тошкент билан Янги Тошкентни боғловчи махсус автобуслар қатнови йўлга қўйилади.

• Тошкент