Ўзбекистонда 8 декабрдан “Lacetti” ва “Cobalt” учун шартнома бериш тўхтатилди. “UzAutosavdo” иловаси ва махсус ботда “Lacetti” ва “Cobalt” контрактацияси имконсиз, яъни мазкур русумдаги автомобилларга тўлов учун шартнома бериш тўхтатилган.

Телеграм ижтимоий тармоғидаги “@UzAvtoSavdo_bot” хизмати орқали ҳолатни текширганимизда янги ишлаб чиқарилган “Onix” седани (11 658 та навбат), энг кўп талабга эга “Damas” (80 007 та навбат), “Tahoe-2” (14 та навбат) “Traverse” (29 та навбат), “Tracker-2” (14 651 та навбат), “Equinox” (25 дона сотувда) ва “Malibu-2” (28 дона сотувда) автомобиллари учун шартнома тузиш мумкин экани ойдинлашди.

Бу ҳақда иқтисодчи Отабек Бакиров ўз Телеграм каналида бу ҳақда ўз мулоҳазаларини билдирган:

“Ҳозирда ўзбекистонлик шўрпешоналар учун энг арзони 152 миллион сўм бўлган ва бир йил кутиш талаб қилинадиган “Onix” седанигина ягона танлов бўлиб қолган.

Монополлаштирилган автомобиль бозори билан боғлиқ вазият ўтган эпохадан ҳам кўра ёмонлашган. Ҳукумат монополист эркатойини қўллаб қувватлашда давом этмоқда”, – дейилади постда.

Қайд этиш мумкин, аввалроқ ишлаб чиқаришдан олингани сабабли “Nexia-3” ва “Spark” автомобилларининг контрактацияси тўхтатилган.

• Автомобил
• Avtomobil uchun shartnoma
• Lacetti
• ЎзАвто