Яман ҳусийлари Эрон ядро объектларига берилган зарбаларга жавобан Қизил денгизда АҚШ кучларига ҳужумлар бошлаш ниятида. Бу ҳақда ҳусийлар сиёсий бюросининг аъзоси Муҳаммад ал-Буҳейти Al Jazeera телеканалига берган интервьюсида маълум қилди.

Al-Буҳейтига кўра, биринчи босқичда Қизил денгиздаги АҚШ кемаларига ҳужумлар уюштирилади. “Ансар Аллоҳ” ҳаракати вакилининг айтишча, май ойида АҚШ ва ҳусийлар ўртасида эришилган сулҳ ўз кучини йўқотган. Ўшанда ҳусийлар Яман ҳудудига ўт очишларни тўхтатилиши эвазига Америка ҳарбий кемаларига ҳужумлар уюштирмаслик мажбуриятини зиммасига олган эди.

Шунингдек, ҳаракат вакилининг огоҳлантиришича, агар АҚШ Исроил ва Эрон ўртасидаги можарога аралашадиган бўлса, исёнчи кучлар минтақадаги Америка манфаатларига зарбалар беради. Олдинроқ ҳусийлар ўз ҳаракатларини Ислом инқилоби муҳофизлари корпуси кучлари билан мувофиқлаштиргани ва Исроилга гипертовушли ракеталар орқали зарбалар уюштиргани тўғрисида хабар берилганди.

АҚШ президенти Доналд Трампга кўра, Америка зарбалари ядровий таҳдидга барҳам бериш мақсадида Эроннинг уранни бойитишга мўлжалланган учта объектига йўналтирилган. Бунга жавобан ҳусийлар Исроил томонидан ҳужумга учрайдиган ҳар қандай араб ёки ислом давлатини қўллаб-қувватлашини маълум қилди.

• АҚШ
• Яман