Ижтимоий тармоқларда ўзини гўёки дефектолог-психолог деб атаган Д.Ж. дудуқланган болаларни сўкиниш, қўрқитиш ҳамда ит каби ҳуркитиш усулида даволашга урингани акс этган видеохабарлар тарқалганди. Ушбу аёлнинг ҳаракатлари юзасидан жиноят иши қўзғатилди. Бу ҳақда Болалар омбудсмани хабар берди.

Маълум қилинишича, Болалар омбудсмани 2024 йилнинг якуни ва 2025 йилнинг январь ойида унинг ҳаракатлари бўйича ўрганиш олиб борган.

Хусусан, Болалар омбудсманининг Д.Ж.нинг иш услубига илмий ва касбий баҳо бериш учун киритган сўрови асосида малакали дефектолог ва логопедлардан иборат ишчи гуруҳ ўтказган ўрганиш натижасида педагог Д.Ж.нинг иш усули мутлақо илмий асосланмаган, мураккаб дудуқланиш муаммосига тор ва ибтидоий ёндашувда экани, Д.Ж.нинг дудуқланишни бартараф этишда қўллаётган руҳий ва жисмоний зўравонлик усуллари болаларнинг соғлиғи ва тарбиясига жиддий зарар келтириши ҳамда педагогика қоидаларига бутунлай зидлиги тўғрисида хулоса берилган.

“Бунинг асосида Болалар омбудсмани томонидан прокуратура органларига ҳолатга ҳуқуқий баҳо бериш тўғрисида сўров киритилган ва Д.Ж.га нисбатан жиноят иши юритуви олиб борилган”, – дейилади хабарда.

Маълум муддатдан сўнг, Д.Ж. аввалгидек дудуқланиши бўлган болалар билан ўзининг илмий асосланмаган, дефектологияга дахли йўқ амалиётини давом эттиргани қайта кузатилган.

Шу билан бирга Д.Ж.нинг бола манфаатларига зид ҳаракатлари юзасидан 2025 йилнинг 2 июнь куни Болалар омбудсмани Бош прокуратурага тегишли сўров юборган.

Бунинг натижасида Тошкент шаҳрининг Юнусобод туман прокуратураси томонидан жиноят ишини тугатиш тўғрисидаги қарор бекор қилиниб, иш ҳужжатлари тергов ҳаракатларини олиб бориш учун Юнусобод туман ИИО ФМБ ҳузуридаги Тергов бўлимига юборилган.

Тергов бўлими томонидан Д.Ж.нинг бола манфаатларига зид ҳаракатлари юзасидан жиноят иши қўзғатилган ҳамда ҳозирда дастлабки тергов ҳаракатлари олиб борилмоқда.

• Болалар
• Жиноят
• Psixolog