Ижтимоий тармоқлар орқали Мактабгача ва мактаб таълими вазирлигининг масъул ходими дея таъкидланаётган эркак жинсий алоқа қилиш эвазига мактаб директорлигига тайинлашда ёрдам бериши ҳақида аудиохабар тарқалди. Мазкур ҳолат юзасидан вазирликнинг матбуот хизмати расмий баёнот билан чиқиб, тизимда ишловчи ушбу эркак ишдан олинганини айтиб ўтди.

“Ижтимоий тармоқларда тарқалган аудиоёзувда вазирлик ходимининг ўзаро манфаат эвазига бошқа бир фуқарога менежерлик сертификатини олиш ҳамда мактаб директорлигига тайинлашда ёрдам бериши ҳақидаги мулоқот хабари юзасидан вазирлик ахборот хизмати қуйидагиларни маълум қилади:

Ушбу вазият иштирокчиси бўлган вазирлик ходими лавозимидан озод этилган.

Айтиш лозимки, вазирлик соҳага доир коррупсион ҳолатлар ҳамда манфаатлар тўқнашувига мутлақо қарши.

Шунингдек, тизимда меҳнат қилаётган барча ходимларнинг касбий одоб-ахлоқ қоидаларига қатъий риоя этиши тарафдори.

Шу каби ноқонуний вазиятларга йўл қўйган ходимларга нисбатан қонунчиликда белгиланган тартибда қатъий чоралар кўрилиши таъминланади” - дея баёнот берди Мактабгача ва мактаб таълими вазирлигининг ахборот хизмати раҳбари Дилфуза Собирова.

• Баёнот
• Мактаб
• Maktabgacha va maktab ta'limi vazirligi
• axborot