Франция президенти Эммануэл Макрон мамлакатда кенг кўламли норозиликларга сабаб бўлган пенсия ислоҳоти тўғрисидаги қонунни маъқуллади. Бугун, 15 апрель куни ҳужжат “Journal officiel de la République français” газетасида чоп этилди.

“Ижтимоий суғурта кодексига ўзгартиришлар киритилмоқда. <…> биринчи хатбошидаги “олтмиш икки” сўзлари “олтмиш тўрт” деган сўзлар билан алмаштирилди”, – дейилади ҳужжат матнида.

Мамлакатнинг бир қанча шаҳарларида пенсия ёшини оширишга қарши митинглар бўлиб ўтди. Хусусан, акцияда камида тўрт минг киши иштирок этган Парижда бошланган тартибсизликлар оқибатида 112 киши ҳибсга олинган.

Март ойида Франция бош вазири Элизабет Борн пенсия ёшини 62 ёшдан 64 ёшга кўтариш ҳақидаги қонун парламентда овоз беришсиз қабул қилинишини маълум қилган эди. Франция парламенти қуйи палатаси аъзолари икки марта ҳукуматга ишончсизлик вотумини қўйиш ва ислоҳотни тўхтатишга ҳаракат қилишди, бироқ иккала ҳолатда ҳам овоз бериш муваффақиятсиз тугади.

Жорий йил 14 апрелда ислоҳотнинг асосий қоидалари мамлакат Конституциявий кенгаши томонидан маъқулланди. Шундан сўнг пенсия ёшини ошириш ҳақидаги қонунга қарши чиққанлар Макрондан ҳужжатни имзоламасликни талаб қилишди. Президентда қонунни имзолаш учун 15 кун бор эди.

Қонун қабул қилингандан кейин мухолифат ислоҳотни бекор қилишга интилишда давом этишини билдирди.

• Fransiya
• norozilik
• пенция