Ўзбекистон Республикаси Президенти Виртуал қабулхонасига Навоий вилоятида яшовчи фуқаро томонидан Навоий вилояти, Хатирчи тумани Халқ таълими бўлими мансабдор шахсларининг хатти-ҳаракатлари ҳамда бўлимдаги ижтимоий-маънавий муҳитдан норозилик юзасидан мурожаатлар келиб тушган.

Ҳолат бўйича, Бош прокуратура Департаментнинг Навоий вилоят бошқармаси томонидан терговга қадар текширув ўтказилган.

Унда маълум бўлишича, Хатирчи туман Халқ таълими бўлими мансабдор шахслари ўзаро жиноий тил бириктириб, 2022 йил июнь–декабрь ойларида 43,6 млн. сўм миқдоридаги рағбатлантириш ва иш ҳақларини ноқонуний ҳисоблаб, бюджет маблағларини талон-торож қилганликлари аниқланган.

Маълум қилинишича, мазкур ҳолат юзасидан Хатирчи туман Халқ таълими бўлими мансабдор шахсларига нисбатан Ўзбекистон Республикаси Жиноят Кодексининг 167-моддаси 2-қисм «г» банди билан жиноят иши қўзғатилиб, тергов ҳаракатлари олиб борилмоқда.

• Maktabgacha va maktab ta'limi vazirligi
• Навоий
• Талон-тарож