Россиянинг Олтой ўлкаси, Рубцовск шаҳри суди ушбу шаҳарда яшовчи Ўзбекистон фуқаросига нисбатан қамоққа олиш тарзидаги эҳтиёт чорасини танлаш тўғрисида қарор чиқарди. 

Қайд қилинишича, 1993 йилда туғилган йигит 24 март куни Рубцовск шаҳридаги дўконда "Крокус Сити Холл" биносида содир этилган террорчилик ҳаракатини очиқчасига оқлаган. 

Шундан сўнг, Россия Жиноят-процессуал кодексининг 91-92-моддаларига асосан ҳибсга олинган. 28 март куни унга нисбатан "Террорчилик ҳаракатини оммавий оқлаганлик" моддаси бўйича айблов эълон қилинган. 

Суд, айбланувчининг Россия жамоат хавфсизлигига қарши ўртача оғирликдаги жиноятни содир этгани, хорижий давлат фуқароси экани, Россия ҳудудида рўйхатдан ўтмагани, доимий яшаш жойи ва қонуний даромад манбаига эга эмаслигини ҳисобга олиб, 2024 йил 26 майга қадар (2 ой муддатга) қамоққа олиш тарзидаги эҳтиёт чорасини танлаган. 

Қарор қонуний кучга кирмаган, айбланувчи шикоят бериши мумкинлиги таъкидланмоқда.

• Россия
• Теракт