“Ўзгидромет” ижтимоий тармоқларда Эрон ҳудудида гўёки “кислотали булутлар” шаклланиб, улар ёғинлар билан Марказий Осиё давлатларига етиб келиши мумкинлиги ҳақидаги хабарлар илмий жиҳатдан асосланмаганини маълум қилди.

Қайд этилишича, кислотали ёғинлар атмосферада олтингугурт оксидлари (СО₂) ва азот оксидлари (НО₂) узоқ вақт давомида тўпланиб, булутларда сув буғи билан кимёвий реакцияга киришиши натижасида юзага келади. Бундай жараёнлар асосан йирик саноат ҳудудлари ва тўғридан-тўғри чиқинди манбалари яқинида кузатилади.

Мутахассислар таъкидлашича, ҳаво массалари узоқ масофаларга кўчиши жараёнида ифлослантирувчи моддалар миқдори атмосферадаги турбулентлик, вертикал аралашиш ҳамда қуруқ ва нам чўкиш жараёнлари таъсирида кескин камаяди. Шу сабабли манбадан минглаб километр узоқликда хавфли даражадаги кислотали ёғинларнинг шаклланиши деярли имконсиз.

Шунингдек, ёғинлар асосан ҳудуд устидаги атмосферада мавжуд сув буғи ва аэрозоллар ҳисобига, маҳаллий булут ҳосил бўлиш жараёнлари натижасида юзага келиши қайд этилди.

Метеорологик кузатувлар ҳамда атмосфера ҳавоси сифати мониторинги маълумотларига кўра, кислотали булутларнинг Ўзбекистон ва қўшни давлатлар ҳудудига кўчиб келиши хавфи кузатилмаяпти.

Мутасаддилар оммавий ахборот воситалари ва ижтимоий тармоқ фойдаланувчиларини тасдиқланмаган маълумотларни тарқатмасликка ҳамда фақат расмий манбаларга таянишга чақирди. Шунингдек, ёлғон ёки тасдиқланмаган ахборотларни тарқатиш учун амалдаги қонунчиликка мувофиқ жавобгарлик чоралари мавжудлиги эслатиб ўтилди.

• Ўзгидромет
• axborot
• yomg‘ir