10 февраль куни Тошкент вилоятида Марказий Осиё атроф-муҳит ва иқлим ўзгаришини ўрганиш университети (“Green University”)нинг очилиш маросими бўлиб ўтди. Бу ҳақда Экология ва атроф муҳитни муҳофаза қилиш ва иқлим ўзгариши вазирлиги хабар берди.

Қайд этилишича, университет Президентнинг 2023 йил 31 майдаги “Экология ва атроф-муҳитни муҳофаза қилиш соҳасини трансформация қилиш ва ваколатли давлат органи фаолиятини ташкил этиш чора-тадбирлари тўғрисида”ги қарори асосида ташкил этилган.

Университетнинг тўлиқ номи “Cеntral Asian Green University” бўлиб, у биологик хилма-хилликнинг йўқолиши, иқлим ўзгариши ва ифлосланишнинг уч карра сайёравий инқирозини ҳал қилишда ёрдам беради.

Ушбу олийгоҳни очишдан мақсад маҳаллий, минтақавий ва глобал экологик муаммоларни самарали бошқариш, экология ва атроф-муҳитни муҳофаза қилиш соҳасида минтақавий ҳамкорликни мустаҳкамлаш, илмий ва интеллектуал салоҳиятни амалга оширишда инновацион ғоялар, амалиёт ва технологияларни жорий этишдир.

Шунингдек, университет давлат олий таълим муассасаси бўлиб, “Hub and Spoke” тамойили асосида фаолият олиб боради.

Маълумот учун, ҳозирда ҳамкорлик учун Буюк Британия, Янги Зеландия, АҚШ ва бошқа давлатларнинг халқаро университетларидан профессорлар университетга фаол жалб этилмоқда.

• Экология
• Ҳамкорлик
• Университет