Ўзбекистондаги бозорларда шакарнинг чакана нархи 12 000-13 500 сўмгача тушди ва ҳозирда шакар заводларида 389 минг тонна шакар маҳсулоти ресурслари мавжуд. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси маълумотларига таяниб Sputnik хабар бермоқда.

Қайд этилишича, бугунги кунда ички бозорларда шакарнинг чакана нархи 12 000-13 500 сўмгача тушган. Йил бошига (13 500 – 14 500 сўмни) нисбатан 10 фоизга пасайган.

“Бугунги кунда маҳаллий шакар заводлари шакар хомашёсини Бразилия давлатидан харид қилишмоқда. Хусусан, 3 июль ҳолатига мазкур заводларда 389 минг тонна шакар маҳсулоти ресурслари мавжуд ҳамда арзон нархларда хомашё етказиб бериш бўйича узоқ муддатли шартномалар имзоланган”, – дейилади хабарда.

Шундан, омборда 3 минг тонна тайёр шакар ва 72 минг тонна хомашё, август ойига қадар 314 минг тонна хомашё етказиб берилади.

Республикада шакар ишлаб чиқарувчи заводлар имконияти

Ҳозирда “Хоразм шакар” МЧЖ ва “Ангрен шакар” МЧЖнинг йиллик умумий ишлаб чиқариш қуввати 900 минг тоннадан ортиқ. Корхоналарнинг ички эҳтиёжни (ўртача 650 минг тонна) 138 фоиздан ортиғини қоплаш имконияти мавжуд.

Биржа савдоларига қўйилаётган шакар ҳолати

Бугунги кунда (3 июль) биржа савдоларида кунлик қўйилаётган 2600 тонна шакар маҳсулотининг 2100 тонна ёки 68 фоизи 1 кг учун ўртача 10 666 сўмдан реализация қилиниб, ўртача бошланғич нархга (11 001 сўм) нисбатан ўсиш 3 фоизни ташкил этмоқда.

Маҳаллий корхоналар томонидан жорий йил январь-июнь ойларида биржа савдоларига жами 336,7 минг тонна шакар қўйилиб, улардан 280,1 минг тонна (83 фоизи) сотилган.

Июнь ойида шакарнинг 1 тоннаси учун ўртача сотилиш нархи спот битимларида 11,5 миллион сўмгача (май ойида – 13,3 миллион сўм) ўртача 14 фоизга ва форвард битимларида 10,7 миллион сўмгача (май ойида – 12,5 миллион сўм) ўртача 15 фоизга пасайганлиги кузатилмоқда.

Статистика агентлигига кўра, январь-май ойларида жами йирик корхоналар томонидан 265,1 минг тонна шакар ишлаб чиқарилган. Мазкур ишлаб чиқариш 2022 йилнинг тегишли даврига нисбатан 2,2 фоизга ошган.

Май ойининг ўзида йирик корхоналар томонидан 62,7 минг тонна шакар ишлаб чиқарилди.

Январь ойида деҳқон бозорларида шакарнинг нархи (1 кг) 11 000 – 14 000 сўмга тенг бўлган.

• Chakana savdo
• Шакар