Қирғизистон фан, олий таълим ва инновация вазири Бактиёр Орозов “давлат ва муниципал ходимларнинг этика меъёрларга риоя қилмагани учун” лавозимидан озод қилинди. Ишдан бўшатиш тўғрисидаги фармон 15 декабрь куни имзоланиб, шу куни давлат раҳбарининг расмий веб-сайтида эълон қилинди.

Кактус.медиа нашрига кўра, Бактиёр Орозов ишдан бўшатилишидан бир кун олдин Чуй вилоятининг Қой-Тош қишлоғида маст ҳолда автомобиль бошқаргани учун қўлга олинган. Ушбу маълумот кейинчалик вилоят йўл ҳаракати хавфсизлиги бошқармаси томонидан ҳам тасдиқланган.

“Текширув давомида ҳайдовчида алкоголь мастлиги белгилари кузатилди. Шунинг учун у Бишкек марказий наркология бўлимига тиббий кўрикдан ўтиш учун юборилди ва унинг алкоголь истеъмол қилгани тасдиқланди. Ҳайдовчига нисбатан Ҳуқуқбузарлик кодексининг 193-моддаси бўйича баённома тузилди. Автомобиль ихтисослаштирилган жарима майдончасига жойлаштирилди”, — дейилади ташкилот хабарида.

Kaktus.media томонидан эълон қилинган видеоёзувда Бактиёр Орозовнинг ўзи ҳам пиво ичганини тан олгани акс этган. Бу ҳолат жамоатчиликда кенг муҳокамаларга сабаб бўлди ва мансабдор шахсларнинг шахсий масъулияти масаласини яна бир бор кун тартибига олиб чиқди.

Маълумот учун, Бактиёр Орозов 2025 йил май ойидан буён Қирғизистон фан, олий таълим ва инновациялар вазири лавозимида фаолият юритиб келаётган эди.

• Iste'fo
• Қирғизистон