Расмийларнинг маълум қилишича, Давлат хавфсизлик хизматининг Андижон ва Фарғона вилоятлари бўйича бошқармалари ходимлари томонидан ўтказилган тезкор тадбирда Қирғиз Республикасидан “Водил авто” чегара божхона пости орқали Фарғона вилояти ҳудудига ўтган вақтида Андижон шаҳрида яшовчи, 1992 йилда туғилган фуқаро тўхтатилиб, ўрнатилган тартибда текширилган.

Натижада, ушбу шахс жами 859 дона заргарлик буюмлари ва 1 дона қўл соатини эгнидаги кийимлари остига яширган ҳолда қўшни давлатдан олиб келганлиги аниқланган.

Экспертлар хулосасига кўра, кимёвий таркиби олтин ҳисобланган, бриллиант тошлари билан безатилган мазкур заргарлик буюмларининг соф оғирлиги 4 кг 155 грамм бўлиб, умумий баҳоси 5 млрд 213 млн сўмни ташкил этади.

Аниқланишича, Андижон ва Фарғона вилоятларида яшовчи 10 нафарга яқин савдогарлар томонидан Туркия давлатидан Қирғиз Республикасига олиб келинган ушбу заргарлик буюмларини мазкур шахс 400 АҚШ доллари хизмат ҳақи эвазига чегара божхона постидан ўтказиб бериши керак бўлган.

Ҳозирда фуқарога нисбатан Жиноят Кодексининг 182-моддаси 2-қисми “а” банди билан қўзғатилган жиноят иши доирасида ушбу қимматбаҳо буюм эгаларининг шахсига аниқлик киритилмоқда.

• Андижон
• ДХХ
• Фарғона