Сурия армияси кучлари мамлакат жануби-ғарбида жойлашган Сувайда шаҳридан чекинишни бошлади. Бу ҳақда Sky News Arabia хабар берди.

Нашр маълумотларига кўра, ҳарбийларнинг чекиниши шаҳар ичкарисида “маҳаллий ички хавфсизлик кучлари” жойлаштирилганидан сўнг бошланган.

Маълум қилинишича, ҳукумат қўшинларининг минтақадан олиб чиқилиши друзлар билан тузилган сулҳ битимининг бир қисмидир. ОАВ хабарларига кўра, қўшинлар олиб чиқилгач, давлат хавфсизлик кучлари минтақада қолади – улар Сувайда яқинидаги йўлларни назорат қилади. Ўт очишни тўхтатиш келишуви доирасида чегара минтақасида можаро авж олишининг сўнгги босқичида содир этилган ҳуқуқбузарликларни текшириш учун друзлар ва расмий Дамашқ вакилларининг қўшма қўмитаси ҳам тузилади. 11 июлдан бери давом этаётган тартибсизликлар чоғида қўлга олинган друзлар ва бадавийлар қўйиб юборилиши, тўқнашувларда бедарак йўқолганлар топилиши ваъда қилинган.

“Биз жиноят содир этган ва бизнинг друзларни ҳақорат қилганларни жавобгарликка тортишга интиламиз, чунки улар давлат ҳимояси остида”, – деган Сурия раҳбари Аҳмад аш-Шара.

Маълумот учун, июль ойи бошида Сувайда шаҳрида друзлар ва бадавийлар ўртасида тўқнашувлар бошланган эди. Ушбу вазият фонида Исроил друзларни ҳимоя қилиш важи билан Дамашққа бир қатор ҳаво ҳужумларини амалга оширди.

• Isroil
• Suriya
• hujum