Йўлак савдони яхшилайди ва жанубий портлар орқали жаҳон бозорларига янги йўллар очади.

Ўзбекистон, Афғонистон ва Покистон Трансафғон темир йўли лойиҳасининг техник-иқтисодий асосларини ишлаб чиқиш бўйича уч томонлама асосли битимни имзолади.

Ҳужжатни имзолаш маросими 17 июль куни Кобулда бўлиб ўтди.

Ўзбекистон, Афғонистон ва Покистон ташқи ишлар вазирларининг биринчи уч томонлама учрашуви ўзаро ишонч, яхши қўшничилик ва минтақавий ҳамкорликни чуқурлаштириш йўлидаги тарихий қадам бўлди, — дейилади Ўзбекистон Ташқи ишлар вазири Бахтиёр Саидовнинг Телеграм-каналида эълон қилинган хабарида.

Қайд этилишича, Ўзбекистон-Афғонистон-Покистон темир йўли бутун Евроосиё учун стратегик аҳамиятга эга. Йўлак савдони яхшилайди, Афғонистоннинг иқтисодий тикланишига ёрдам беради ва жанубий портлар орқали жаҳон бозорларига янги йўналишларни очади.

Савдо алоқаларини мустаҳкамлаш, қишлоқ хўжалиги, фармацевтика, тўқимачилик ва қурилиш соҳаларида ҳамкорликни кенгайтириш, шунингдек, Термиз халқаро савдо маркази салоҳиятини ошириш тарафдоримиз эканимизни яна бир бор тасдиқладик, – дейилади хабарда.

• Афғонистон
• Покистон