Қорақалпоғистонда автомобилларга газ тўлдириш компрессор шохобчалари фаолияти вақтинча чекланди. Бу ҳақда “Ҳудудгаз Қорақалпоғистон” газ таъминоти филиали матбуот хизмати маълум қилди.

Маълумотга кўра, ҳудудда ҳаво ҳароратининг кескин пасайиши натижасида магистраль газ тармоқларида босим тушиб кетган. Шу боис газ таъминоти биринчи навбатда аҳоли хонадонлари ва ижтимоий соҳа объектларига йўналтирилмоқда.

Корхона изоҳида таъкидланишича, метан “заправка”ларга босқичма-босқич вақтинчалик чекловлар жорий этилган. Бу чоралар маиший истеъмолчиларни узлуксиз газ билан таъминлаш мақсадида амалга оширилмоқда.

Хабар қилинишича, мавжуд вазият яқин 3–4 кун ичида барқарорлашиши кутилмоқда. Газ босими тикланиши билан шохобчалар фаолияти ҳам босқичма-босқич қайта йўлга қўйилади.

• Газ
• Қорақалпоғистон