Reuters хабарига кўра, Хитойда илгари учрамаган янги турдаги яшур касаллиги, яъни чорва орасида тез юқадиган вирус аниқланган.

Касаллик Гансу вилояти ва Шинжон-Уйғур автоном туманида жойлашган икки подада қайд этилган. Бу ҳудудлар бир нечта давлатлар, жумладан Россия билан чегарадош. Жами 6229 бош қорамолдан 219 тасида касаллик аниқланган. Шундан сўнг зарарланган барча ҳайвонлар йўқ қилинган ва фермаларда тўлиқ дезинфекция ишлари ўтказилган.

Лаборатория текширувлари бу касаллик САТ1 турига мансуб эканини кўрсатган. Бу тур Хитойда илгари учрамаган. Аҳамиятлиси шундаки, мамлакатда мавжуд вакциналар айнан шу турга қарши ҳимоя бермайди. Шу сабабли касалликнинг кенг тарқалиш хавфи юқори баҳоланмоқда.

Шу билан бирга, охирги ойларда Россиянинг бир қатор ҳудудларида ҳам чорва касаллиги кенг тарқалган. Турли вилоятларда жами қарийб 90 мингдан ортиқ қорамол йўқ қилинган. Расмийлар буни дастлаб бошқа касаллик деб баҳолаган бўлса-да, мутахассислар бу ҳам яшур бўлиши мумкинлигини айтмоқда.

Мутахассисларнинг таъкидлашича, яшур жуда тез юқади ва уни жиловлашнинг асосий усули зарарланган ҳайвонларни тўлиқ йўқ қилишдир. Шу боис бу ҳолат чорвачилик ҳамда гўшт-сут маҳсулотлари савдосига жиддий таъсир кўрсатиши мумкин.

• Чорвачилик
• Касаллик
• Вирус
• Хитой