Самарқандда уч нафар фарзандини ўлдирган отага нисбатан умрбод озодликдан маҳрум қилиш жазоси тайинланди. Бу ҳақда “Yoshlar” телеканалида маълум қилинди.

Маълум бўлишича, жорий йилнинг 16 июнь куни соат 19:30 лар атрофида Самарқанд шаҳрида 1986 йилда туғилган фуқаро А.Д. Исроилда ишлаётган турмуш ўртоғи билан телефон орқали жанжаллашиб қолган. Эркак келиб чиққан ўзаро келишмовчилик оқибатида турмуш ўртоғидан ўч олиш мақсадида вояга етмаган 3 нафар фарзандини ошхона пичоғи билан таналарининг турли жойларига қасддан уриб, ўлдирган. Сўнгра, эркак пичоқ билан ўзига ҳам тан жароҳати етказган.

Ҳолат юзасидан фуқаро А.Д.га нисбатан Жиноят кодексининг 97-моддаси 2-қисми “а” ва “v” бандлари билан жиноят иши қўзғатилган эди.

Тергов давомида ижтимоий тармоқларда тарқалган хабарлар, яъни эркак ўша вақтда гиёҳванд модда таъсирида бўлгани ҳақида тахминлар ўз тасдиғини топмаган.

“Аёлим бошқа сен билан яшамайман. Менинг эрим бор, ҳаётим бор, деди. Катта қизчам қўлимда жон берди. Кўриб, қўрқиб кетдим. Йиғладим, додладим, кейин ўзимни пичоқладим. Шу билан ҳушимдан кетдим. Ўзимга келсам шифохонада эканман”, дейди ўз фарзандларининг қотилига айланган ота.

Унга нисбатан Жиноят кодексининг 97-моддаси 2-қисми “а”, “v”, “j” бандлари билан умрбод озодликдан маҳрум қилиш жазоси тайинланди.

• ИИБ
• Қотиллик
• Самарқанд