Юракнинг ўнг томонда жойлашиши тиббиётда декстрокардия дейилади ва ҳар 100 тадан бир ҳолатда учрайди. Бунда юрак ва катта томирлар жойлашув ўрни тананинг ўнг томонига оққан бўлади. Мазкур ҳолатда тананинг ўрта чизиғига нисбатан симметриклик сақланади.

Одатда, декстрокардия ҳамма жуфт аъзоларнинг ўнг томонга силжиши билан қўшилиб келади. Ҳолат клиник жиҳатдан ўзини намоён қилмайди. Бола туғилганда тиббий кўрик вақтида, катталарда эса флюорография, рентгеноскопия, ЭКГ ёки кўкрак қафасини бошқа аппаратларда текшириш чоғида аниқланади.

Декстрокардияси бўлган кишилар кўпроқ инфекцион касалликларга учрашга, айниқса, ўпка ва бронхларни асоратлар қолдирадиган патологияларга моил бўладилар.

Декстрокардиянинг аниқ характерга эга симптомлари йўқ. Инсон бундай аномалия билан одатий ҳаёт тарзини кечириши ва турли касалликларга учраши мумкин.

Агар декстрокардияга қўшимча тарзда эрта болалик даврида ўткир юрак етишмовчилигига олиб келадиган бошқа симптомлар бўлса, у ҳолда тезда тиббий ёрдамга шошилиш керак. Яъни:

· Терининг кўкариши ёки оқариши, айниқса, бақирганда;

· Яққол намоён бўладиган ҳолсизлик;

· Ҳансираш;

· Янги туғилган чақалоқнинг териси ва кўз оқида узоқ вақт сариқликнинг кетмаслиги;

· Аритмиянинг бўлиши юракда муаммо борлигини билдиради.

Болалик давридаги бу каби симптомлар беморни синчковлик билан текширишга, сабабларини аниқлашга ва муолажа масаласини ҳал қилишга асосдир. Каттароқ ёшдаги болалар кардиолог назоратида ва рўйхатида бўлиб, йилда 3-4-марта текширувдан ўтадилар.

Сизларда юқорида саналган аломатлар безовта қилмаган бўлса, хулоса қилиш мумкинки, юрагингиз ўнг томонда бўлса ҳам, сиз соғломсиз деб айтиш мумкин.

Юрак декстропозитсияси касаллик эмас, балки анатомик ўзига хослик. Уни аниқлаш учун шифокор тавсияси, йўлланмаси керак. Катталар тиббий кўрик вақтида, жарроҳлик амалиётлари олдидан бу ҳақда шифокорни огоҳлантиришлари шарт. Фаол жисмоний ҳаракат қўшимча аномалиялар ёки касалликлар бўлганидагина чекланади.

Нигора Низомова, кардиолог

• Lifestyle
• Тиббиёт
• қизиқарли
• саломатлик