Словакиянинг “Финанčнé Noviny” газетасида “Ўзбекистон хорижий инвесторлар учун жозибадор макон ҳисобланади” сарлавҳаси остида мақола эълон қилинди.

Мақолада Ўзбекистон сўнгги йилларда жадал иқтисодий ислоҳотлар олиб бориб, чет эллик инвесторлар учун жозибадор мамлакатга айланаётганлиги ҳақида сўз боради.

“Давлат корхоналарининг хусусийлаштирилиши, бизнес рўйхатидан ўтказиш жараёнларининг соддалаштирилиши ва рақамлаштириш орқали бюрократиянинг камайтирилиши, мамлакатнинг бозор иқтисодиётига ўтишга бўлган қатъий интилишини намоён этмоқда. Бу орқали 2017 йилдан бери 120 миллиард долларлик сармоя жалб қилинди” – дейилади мақолада.

Ўзбекистон инфратузилмани замонавийлаштиришга катта эътибор бермоқда — транспорт тармоқлари, қайта тикланувчи энергия манбалари ва рақамли инфратузилма жадал ривожланмоқда. 5G технологияси ва юқори тезликдаги интернет мамлакат бўйлаб кенг қамровли бўлиб, бизнес фаолияти учун қулай шароит яратилган.

Шу билан бирга, инсон капиталига ҳам жиддий сармоя киритилмоқда — хусусий ОТМ ва техникумлар сони кўпаймоқда, ёш мутахассислар етиштирилмоқда.

Ҳукумат инвестиция муҳитини яхшилашга қаратилган ислоҳотларни давом эттирмоқда, солиқ ва божхона имтиёзлари, мулк ҳуқуқини ҳимоя қилиш кафолатлари ва махсус иқтисодий зоналар орқали инвесторларни жалб этмоқда. Халқаро компаниялар — Masdar, ACWA Power, Linde ва бошқаларнинг мамлакатда фаолият юритиши Ўзбекистоннинг халқаро миқёсдаги инвестициявий жозибадорлигини янада оширмоқда.

• Инвестиция
• Иқтисодиёт
• Туризм
• словакия