Рамазон эҳсони баҳонасида ўқитувчилардан пул йиғиш топшириғини берган Жарқўрғон тумани ҳокими ўринбосари Анвар Ражабов ишдан олинди. Бу ҳақда Сурхондарё вилояти ҳокимлиги ахборот хизмати раҳбари Муродбек Давлатов хабар берди.

Хабарга кўра, Жарқўрғон туманидаги 33-сонли умумтаълим мактаби педагог ходимларидан пул маблағи мажбурий тартибда йиғилаётгани ҳақидаги хабар юзасидан тайинланган хизмат текшируви якунланган. Текширув вилоят ҳокими назоратида ўтказилиб, ҳолатлар комплекс тарзда ўрганилди, ҳужжатлар таҳлил қилинди ва масъул шахсларнинг тушунтиришлари олинган. Натижада Жарқўрғон тумани ҳокимининг ўринбосари Анвар Ражабов томонидан берилган кўрсатма амалдаги қонунчилик талабларига зид экани, хусусан, ихтиёрийлик тамойили бузилгани аниқланган.

Хизмат текшируви хулосасига мувофиқ Анвар Ражабов эгаллаб турган лавозимидан озод этилиб, унинг ҳаракатларига ҳуқуқий баҳо бериш учун текширув материаллари белгиланган тартибда ҳуқуқни муҳофаза қилувчи органларга юборилган.

• Iste'fo
• Мансабдор шахс
• Сурхондарё