Тошкент метрополитенидаги барча бекатларда йил охирига қадар кассаларнинг фаолияти тугатилади. Бу ҳақда Тошкент метрополитени ДУК корхонасининг матбуот хизмати хабар берди.

“Бугунги кунда Тошкент метрополитени йўловчиларига қулайлик яратиш ҳамда касса олдидаги тирбандликларни камайтириш мақсадида йўл ҳақини тўлашнинг 10 дан ортиқ тури мавжуд бўлиб, метрода тўлов тизимини амалга оширишда электрон турдаги тўлов усуллари янада ривожланиб бормоқда. Шунингдек, метро хизматидан камдан-кам фойдаланувчилар ҳамда шаҳримиз меҳмонлари учун янада қулайлик ҳосил қилиш мақсадида кўплаб бекатларда чипта сотиб олиш учун мўлжалланган автоматлаштирилган банкоматлар ўрнатилмоқда.

Шу сабабли, касса оператори лавозимидаги ходимларига бўлган талаб камайиб бормоқда. Шу муносабат билан ёпилган кассалардаги оператор лавозими иш ўринлари босқичма-босқич қисқартирилмоқда. Жумладан, биринчи босқич доирасида 204 та касса оператори лавозим штатлари белгиланган норматив ҳуқуқий ҳужжатлар асосида қисқартирилди.

Юқорида таъкидланган автоматлаштирилган банкоматларни метрополитеннинг барча бекатларида йил якунига қадар ўрнатиш режалаштирилган ва бунинг натижасида, Тошкент метрополитенида касса оператори ва катта оператор лавозимларига бўлган эҳтиёж қолмайди ҳамда ушбу лавозимлар тўлиқ тугатилишини маълум қиламиз.

Шуни инобатга олган ҳолда, “Тошкент метрополитени” ДУК маъмурияти томонидан фаолият юритаётган оператор ходимлар учун янги қўшимча имкониятлар яратиш режалаштирилмоқда. Хусусан, хизмат лавозими қисқартирилаётган ҳар бир ходимга, ўз истак ва имкониятларидан келиб чиқиб, касб-ҳунар ўрганиш курсларида иштирок этиш таклиф қилинади. Улар бухгалтерия, тикувчилик, қандолатчилик ва шу каби бошқа йўналишлардаги курслардан бирини танлаш имкониятига эга бўладилар.

Энг муҳими, ушбу ўқув курсларининг тўловлари белгиланган тартибда “Тошкент метрополитени” ДУК томонидан тўлиқ қоплаб берилади.

Мазкур ташаббусдан кўзланган асосий мақсад — лавозими қисқартириш жараёнида бўлган ходимларни қўллаб-қувватлаш, уларга янги касб ўрганиш орқали барқарор даромад манбаини яратишдир” - ташкилот берган расмий ахборотда.

• Ish
• Метро
• Metropoliten
• Тошкент