Жорий йилнинг 28 октябрь куни Президент Шавкат Мирзиёев “Ўзбекистон Республикасининг Меҳнат кодексини тасдиқлаш тўғрисида”ги қонунни имзолади.

Кодекс меҳнат муносабатлари соҳасида аҳоли томонидан давлат ва вакиллик органларига энг кўп йўлланадиган мурожаатлар ва эътирозларга аниқ ечимларни тақдим этади.

Унда иш берувчининг иш ҳақини кечиктириш учун жавобгарлик (кечиктирилган ҳар бир кун учун қайта молиялаш ставкасининг 10 фоизи миқдорида) белгиланмоқда.

Шунингдек, ходимнинг пенсия ёшига етганлиги муносабати билан иш берувчининг ташаббуси асосида меҳнат шартномасини бекор қилиш асоси чиқариб ташланди. Ишдан бўшатиш нафақасини иш берувчида ишлаган стажига қараб дифференсиациялашган миқдори белгиланган.

Бундан ташқари, меҳнат низоларини кўриб чиқиш жараёнида жамоатчилик назорати механизмлари акс эттирилди. Якка меҳнат низолари комиссияларда ёки судда ҳал этилиши ҳолатлари кўрсатилган, якка меҳнат низоси медиаторга юборилишини жорий этиш, меҳнат арбитражи тизими йўлга қўйилади.

Низоларни муқобил ҳал қилишнинг имкониятлари кенгайтирилиб, судлардаги иш ҳажми камайтирилди. Айрим тоифадаги ходимларнинг меҳнати ҳуқуқий жиҳатдан тартибга солинди.

Шунингдек, иш берувчи томонидан иш вақти режимининг турли хил вариантларини белгилаш механизмлари (сменали иш, мослашувчан иш режими, иш кунини қисмларга бўлиш ва бошқалар) жорий этилмоқда.

Микрофирмалар, ЯТТларда меҳнат қонунчилиги соддалаштирилиши, иш берувчиларга муддатли меҳнат шартномасини тузиш асослари кенгайтирилади, иш берувчи томонидан хизмат текширувларини ўтказиш ва ишдан четлаштириш тартибга солинади.

Энг муҳими, янгиланган Кодекс билан меҳнат ҳуқуқларини тартибга солишдаги бўшлиқлар ва қарама-қаршиликлар бартараф этилади.

Янги қабул қилинган меҳнат кодексида яна ўзбекистонликлар учун давлат байрамлари расмий дам олиш кунига тўғри келса, қўшимча дам олиш берилиши белгиланган.

Ундан ташқари, энди Ўзбекистонда 15 ёшдан кичик ўқувчиларга қонуний ишлаш учун рухсат берилади.

• Ish beruvchi
• Иш стажи
• Ishchi
• Меҳнат ҳуқуқи