Айни пайтда Олий Мажлиси Қонунчилик палатасининг навбатдаги мажлиси бошланди.

Олий Мажлис Қонунчилик палатасининг навбатдаги мажлисида депутатлар Ўзбекистон Республикаси Давлат бюджетининг ва давлат мақсадли жамғармалари бюджетларининг 2021 йилдаги ҳамда 2022 йилнинг биринчи чорагидаги ижроси тўғрисидаги ҳисоботни кўриб чиқмоқдалар.

Кун тартибидаги масала юзасидан молия вазири Тимур Ишметов ахборот тақдим этяпти.

Вазирнинг маълум қилишича, ҳисобот даврида Ўзбекистон иқтисодиётида юқори ўсиш суръатларига эришишда  саноат, хизматлар ва қурилиш соҳалари иқтисодий ўсиш драйверлари бўлиб хизмат қилди. Хусусан, иқтисодий ўсиш саноатда 9,2 фоиз, хизматлар соҳасида 8,7 фоиз, қурилишда 6,8 фоиз ҳамда қишлоқ, ўрмон ва балиқ хўжалигида 4,0 фоизга таъминланди.

2021 йил якунлари ижросида Давлат бюджетининг харажатлари (давлат мақсадли жамғармаларисиз) эса 188,3 трлн. сўмни ёки ялпи ички маҳсулотга нисбатан 25,6 фоизни ташкил этди. Ижтимоий харажатларни молиялаштириш учун Давлат бюджетидан 92,0 трлн. сўм ёки умумий харажатларнинг 48,9 фоизи миқдорида маблағ сарфланди. Ушбу харажатларнинг 87,7 фоизи ижтимоий соҳа ва аҳолини ижтимоий қўллаб-қувватлаш харажатлари ҳиссасига тўғри келади.

Қайд этилишича, Молия вазирлигининг Давлат молиявий назорати департаменти томонидан 2022 йил 1-чорагида ўтказилган 1 687 та молиявий назорат тадбирларидан 1 283 тасида 261,7 млрд. сўм миқдоридаги молиявий хатоликлар, жумладан 39,2 млрд. сўм миқдорида камомад ва ўзлаштиришлар, 199,8 млрд.сўми бюджет маблағларидан асоссиз ва ортиқча тўловлар ҳамда 22,7 млрд. сўми мақсадсиз харажатлар ҳуқуқбузарликларнинг бошқа турлари аниқланган.

• Ҳисобот
• Молия
• Қонунчилик палатаси