Асирлардан бири, Ван Гуансзюн пандемия вақтида Хитойда ишсиз қолганини ва янги иш излай бошлаганини айтган. Аввалига у россиялик ишга ёлловчи билан ярадор ҳарбийлар учун реабилитолог бўлиб ишлашга келишган. Бироқ унинг сўзларига кўра, кейинчалик “армияга тушиб қолган ва бошқа танлов имкони бўлмаган”.

Ван 2025 йил 5 февралда Россияга келган, беш кунлик ҳарбий тайёргарликдан ўтган ва фронтга жўнатилишини кутган. 4 апрель куни уни жанговар ҳаракатлар ҳудудига юборишган.

Иккинчи асир — Чжан Ренбо Хитойда ёнғин ўчириш хизматида ишлаганини айтган. У Россияга саёҳат қилиш учун келган ва “бир оз пул ишлашни” истаган. Чжаннинг сўзларига кўра, Россияда дастлаб унга қурилишда ишлашни таклиф қилишган. У 2024 йил декабрда Москвага келган. Сўнгра Чжанни аннексия қилинган Донеск шаҳрига юборишган. Апрель ойида эса у Украина ҳарбийлари томонидан асирга олинган.

“Украинская правда” нашрининг ёзишича, матбуот анжумани давомида хитойликлар бир неча бор асирлар алмашинувида иштирок этишга тайёр эканликларини ва Хитойга қайтишни исташларини таъкидлашган.

Эслатиб ўтамиз, Украина Қуролли кучлари томонидан Хитойнинг икки нафар фуқароси асирга олингани ҳақида 2025 йил апрель ойи бошида маълум бўлган эди. Улардан бири Украина ҳарбийларига ватанидаги воситачига Россия армияси сафига қўшилиш учун 300 минг рубль (3,6 минг доллар) тўлаганини айтган эди.

• Россия
• Украина
• Уруш
• Хитой