Kun.uzning ma’lum qilishicha, Buxoro viloyatining Buxoro tumanidagi “Shayxoncha” mahallasida ikki nafar erkak elektr toki urishi oqibatida halok bo‘lgan.

Baxtsiz hodisa 19-iyulga o‘tar kechasi sodir bo‘lgan. Xususiy tadbirkorga qarashli novvoyxona ishchilari qo‘lbola mo‘ri o‘rnini o‘zgartirishga uringan. Ko‘tarilish vaqtida konstruksiya 3,5 metr balandlikdagi yuqori voltli simga tegdi. Elektr toki urishi natijasida to‘rt nafar erkak tan jarohati oldi – ulardan ikki nafari olgan jarohatlaridan voqea joyida halok bo‘ldi. Yana ikki kishi kasalxonaga yotqizilgan.

Marhumlarning jasadlarini sud-tibbiy ekspertizadan o‘tkazish, shuningdek, kasalxonaga yotqizilganlarni ekspertizadan o‘tkazish belgilangan.

Mazkur holat yuzasidan Buxoro tumani IIB huzuridagi tergov guruhi tomonidan Jinoyat kodeksining 257-moddasi 2-qismi “a” bandi (Mehnatni muhofaza qilish qoidalarini buzish) bilan jinoyat ishi qo‘zg‘atilgan. Hozirda holat yuzasidan dastlabki tergov harakatlari olib borilmoqda.

• Buxoro
• IIB