16-iyulga o‘tar kechasi Rossiya Qurolli Kuchlari Ukrainaning Vinnitsa shahriga yirik hujum uyushtirdi. Natijada 7 kishi yaralangan. Bu haqda, Vinnitsa viloyati harbiy ma’muriyati rahbari o‘rinbosari Natalya Zabolotnaya Facebook orqali ma’lum qildi.

Uning so‘zlariga ko‘ra, zarbalardan so‘ng sanoat va fuqarolik infratuzilmasi obyektlariga zarar yetgan.

Ma’lumotlarga ko‘ra, yetti nafar jabrlanganlardan besh nafariga kuyish tashxisi qo‘yilgan. Ikki nafarining ahvoli og‘ir, uch nafarining esa o‘rtacha og‘irlikda ekani rasmiylar tomonidan bildirildi.

Xarkov shahri ham kechasi Rossiya qo‘shinlari tomonidan o‘qqa tutilgan. Viloyat davlat ma’muriyati rahbari Oleg Sinegubovning so‘zlariga ko‘ra, 20 daqiqada 17 ta portlash qayd etilgan va dastlabki ma’lumotlarga ko‘ra, uch kishi jarohat olgan.

Tungi hujum Krivoy Rog shahrida ham amalga oshirilgan. Shaharda elektr ta’minotida katta uzilishlar kuzatilgan. 17 yoshli o‘smir og‘ir yaralangan, shahar mudofaa kengashi rahbari Aleksandr Vilkulning ma’lumotiga ko‘ra, shifokorlar uning hayoti uchun kurashmoqda.

• Rossiya
• Ukraina
• Urush