O‘zbekiston Moliyaviy xavfsizlik bo‘yicha xalqaro olimpiadada ishtirok etadi. Bu haqda Rossiya bosh vaziri o‘rinbosari Dmitriy Chernishenko ma’lum qildi.

Qayd etilishicha, olimpiadada 15 davlat vakillari ishtirok etadi. Ular orasida Namibiya, Eron va Pokistondan ishtirokchilar birinchi marta musobaqada qatnashadi.

“Agar 2021-yilda olimpiadada yetti davlatdan maktab o‘quvchilari va talabalari ishtirok etgan bo‘lsa, 2022-yilda 12 davlat, jumladan, BRIKS mamlakatlari (Braziliya, Rossiya, Hindiston, Xitoy, Janubiy Afrika) ham ishtirok etadi”, – dedi Chernishenko.

Uning ta’kidlashicha, Rossiyada joriy yilda o‘quvchilar va talabalarni olimpiadalararo tayyorlash markazi tashkil etilgan. Uning asosiy vazifalaridan biri olimpiadani rivojlantirishdan iborat. Shuningdek, DXR, LXR, Xerson va Zaporojye viloyatlaridan bolalar va yoshlarni jalb qilishga alohida e’tibor qaratilishini aytib o‘tgan.

Bundan tashqari, Bosh vazir o‘rinbosari Olimpiadaga do‘st davlatlar, xususan, Kuba va Vyetnam vakillarini jalb etish imkoniyatlarini ko‘rib chiqishni tavsiya qildi.

Olimpiadaning oldingi ikki yili natijalariga ko‘ra, nafaqat erishilgan natijalarni saqlab qolish, balki ularni sezilarli darajada yaxshilash ham zarurligiga urg‘u bergan Chernishenko.

Qayd etilishicha, 2021-2022-yillarda olimpiadaning saralash bosqichlariga 70 mingdan ortiq ariza topshirilgan, 860 dan ortiq ishtirokchi finalga chiqqan, 223 nafari esa sovrindor va g‘olib bo‘lgan.

Olimpiada g‘oliblari oliy o‘quv yurtlarining ixtisoslashtirilgan yo‘nalishlariga imtihonlarsiz o‘qishga kirish imkoniyatiga ega bo‘ladi.

Ma’lumot uchun, Xalqaro moliyaviy xavfsizlik olimpiadasi uchinchi bor o‘tkazilmoqda. 2021-yilda unda yetti davlat (Rossiya, Belarus, O‘zbekiston, Tojikiston, Turkmaniston, Qozog‘iston, Qirg‘iziston), 2022-yilda 12 davlat – Rossiya, Belarus, O‘zbekiston, Tojikiston, Turkmaniston, Qozog‘iston, Qirg‘iziston, Armaniston, Hindiston, Xitoy, Janubiy Afrika, Braziliyadan ishtirokchilar qatnashgan.

• Olimpiada
• Ta'lim