Ijtimoiy tarmoqlarda Nurobod tumani 41 umumta’lim maktabining 8-sinf o‘quvchisi Sattarov Sardor “1 million dasturchi” loyihasining tuman va viloyat bosqichida birinchi o‘rinni olishiga qaramay unga 3-darajali diplom hamda ishlatilgan (eski) noutbuk sovg‘a qilinganligi to‘g‘risida videomurojaati tarqaldi.

Uning aytishicha, hatto kompyuter xotirasida avval foydalangan egasining ayrim ma’lumotlarigacha saqlanib qolgan.

Nurobod tumani hokimligi ushbu holat bo‘yicha munosabat bildirib, ayni vaqtda o‘rganish ishlari olib borilayotganini ma’lum qildi.

Hokimlik munosabatida aytilishicha, joriy yilning 6-yanvar kuni  Nurobod tumanidagi umumta’lim maktablarining 7-11-sinf o‘quvchilari o‘rtasida “Bir million o‘zbek dasturchilari” loyihasi asosida “IT-TANLOV”ning tuman bosqichi bo‘lib o‘tgan.

Mazkur musobaqada 41-umumta’lim maktabining 8-sinf o‘quvchisi S.Sattarov faxrli birinchi o‘rinni olib, tuman hokimligining faxriy yorlig‘i hamda “realme C11” rusumli telefon apparati bilan taqdirlangan.

Hozirda yuqoridagi holat yuzasidan Nurobod tumani hokimligi tomonidan ishchi guruh tuzilib, dastlabki o‘rganish ishlari olib borilmoqda.