Bugun, 2-sentabr kuni Prezident Shavkat Mirziyoyev Islom Karimov nomidagi ilmiy-ma’rifiy yodgorlik majmuasiga tashrif buyurib, Birinchi Prezident haykali poyiga gulchambar qo‘ydi. Bu haqda O‘zbekiston Prezidenti Matbuot xizmati xabar bermoqda.

“Islom Karimov bundan o‘ttiz bir yil oldin mamlakatimizning milliy mustaqilligini dunyoga e’lon qilgan edi. Bu davlatchiligimizni va insoniy haq-huquqlarimizni tiklab, barcha yutuq va marralarimizning zamini bo‘ldi. Shu bois, Birinchi Prezidentimizga hurmat o‘z tariximizga hurmat ifodasidir”, – deyiladi xabarda.

Qayd etilishicha, xotira tadbirida Islom Karimovning xalqimiz manfaati yo‘lidagi xizmatlari yodga olinib, Qur’on tilovat qilingan.

Shuningdek, davlat rahbari ustozlarni qadrlash va hamisha yodga olish kerakligini, bu esa yosh avlodga o‘rnak bo‘lishini ta’kidlagan.

O‘zbekiston Respublikasi Oliy Majlisi, Prezident Administrasiyasi, Vazirlar Mahkamasi, vazirlik va idoralar, poytaxt jamoatchiligi vakillari ham Birinchi Prezident haykaliga poyiga gul qo‘ydi.

Qayd etish mumkin, xuddi shunday tadbirlar Samarqand va Qarshi shaharlarida ham o‘tkazildi.

• Islom Karimov
• Prezident
• Shavkat Mirziyoyev
• Xotira