Shavkat Mirziyoyev 24-fevral kuni Nukus shahridagi Chimboy guzari mahallasida bo‘ldi. Bu haqida Prezident matbuot xizmati xabar berdi.

Qayd etilishicha, odamlar bu yerga 2000-yillardan o‘rnasha boshlagan. Uylar rejasiz qurilgani sababli ko‘chalar tartibsiz bo‘lib qolgan, elektr energiyasi va ichimlik suvi yetishmagan. Hozirga kelib mahalla aholisi 14 mingdan oshgan. Bu yerda ijtimoiy infratuzilmani yaxshilash masalasi dolzarb bo‘lib borgan. Hudud yaqinda “Obod mahalla” dasturi doirasida obodonlashtirilgan. Ko‘chalar ta’mirlanib, piyodalar yo‘lakchasi qurilgan.

Transformator va ustunlar o‘rnatilib, elektr tarmoqlari tortilgan. Ariqlar tozalanib, daraxtlar ekilgan. Mahallada ish joyi va tibbiy xizmat yo‘q bo‘lgan. Shu bois yengil konstruksiyadan to‘qimachilik korxonasi tashkil etildi. U yerda 300 dan ortiq xotin-qiz ish bilan ta’minlandi. Davlat rahbari ular bilan suhbatlashdi.

“Mahalladagi o‘zgarishlarni, sizlarning ishli bo‘lganingizni ko‘rib, xursand bo‘ldim. Qo‘lida hunari bor ayolning kayfiyati yaxshi, oilasi ham barqaror bo‘ladi. Bunday ishlarni hali ko‘p qilishimiz kerak. Albatta, qiyin bo‘ladi. Lekin biz bir oilamiz. Birlashib, hamma rejalarni amalga oshira olamiz”, – degan Shavkat Mirziyoyev.

Prezident bu yerda mahalla markazi qurish, shahardagi boshqa og‘ir hududlarni ham obod qilish bo‘yicha ko‘rsatmalar bergan. Shu yerdagi tibbiy xizmat punkti ham ko‘zdan kechirilgan. Qoraqalpog‘istonda yangi klinikalar qurish, tibbiyot klasterlari tashkil etish rejalari muhokama qilingan.

Mahallaning Ko‘ktepa ko‘chasidagi 8 ta uy namunaviy xonadonga aylantirilgan. Hovlilar tartibga keltirilib, issiqxonalar qurilgan. Prezident ulardan biri – Gabit Jusupov xonadonida mehmon bo‘ldi.

“Kechadan beri Qoraqalpog‘istonning eng uzoq, eng og‘ir hududlariga boryapiz. Hozir menga aytishdi: Nukusda sharoiti yomon yana yettita mahalla bor ekan. Ularni ham obod qilish, yo‘lini, suvini, elektrini to‘g‘rilash bo‘yicha rejalarni belgiladik”, – degan davlat rahbari.

• Prezident
• Qoraqalpog‘iston
• Shavkat Mirziyoyev