O‘zbekistonda mart oyining avvalidan boshlangan yog‘ingarchiliklardan so‘ng ijtimoiy tarmoqlarda UzAuto Motors ishlab chiqargan avtomobillari saloniga suv kirib ketayotgani bilan bog‘liq turli shikoyatlar ko‘paydi.

Ana shunday videotasvirlarning birida isteʼmolchi o‘z avtomobilidan suv o‘tganini ko‘rsatib bunga zavob tomonidan ayrim detallarning qo‘yilmagani sabab bo‘layotganini aytadi. U o‘ziga tegishli bo‘lgan Nexia-3 avtomobilining pol qismiga shovqin va boshqa taʼsirlardan saqlovchi rezina moslamalar (“salniklar”) o‘rnatilmagani, shu bois salonga suv kirib ketayotganini aytadi.

Qonunchilik palatasi deputati Rasul Kusherbayev holatga munosabat bildirar ekan, o‘zining bir paytlar avtokompaniyadan sifat talab qilganida populistga chiqarilgani haqida eslaydi.

 “Biz dushmanlik qilmoqchi emasmiz, biroq UzAuto Motors haqiqatan ham sifatsiz avtomobillar chiqarishi, unga baʼzi detallarni qo‘ymasligi fakt.

Bu yo‘l avtomobil narxini tushirish uchun, degan mantiqsiz qarash bor. Biz bu haqida ularni o‘ziga ham aytib, sifatni talab qilganimizda populistga chiqarilgandik”, – deydi u.

Deputat, shuningdek, monopol kompaniyaning davlat tomonidan “eʼzozlanishi”ga ham to‘xtalib o‘tadi.

“Davlat o‘z xalqi ustidan kulib, asli narxi 4 ming dollar deyilgan mashinani bir necha baravar yuqori narxga pullab haq oladigan mana shunday kompaniyani qo‘yniga olib, qo‘llab turibdi: xalq – isteʼmolchi nima bo‘lsa bo‘lsin, zavod “soqqa” qilsin!

Xatto xalqni huquqini himoya qilib, “O‘zavtoMotors”dan qonuniy ishlashni talab qilgan Antimonopoliya rahbari xalqni yonini olgani uchun ishdan olingan...

Qiziq tomoni zavodni qo‘llayotgan amaldorlarni aksariyati bunday sifatsiz avtomobillarni o‘zlariga ravo ko‘rmaydi, “inomarka”larda yurishadi: ikkiyuzlamachilar”, – deydi Kusherbayev.

• Avtomobil
• Deputat
• Kusherbayev
• UzAutoMotors