O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida o‘tkazilgan brifingda “Vaqf” xayriya jamoat fondi axborot xizmati rahbari Saidabror Umarov ko‘rsatilgan yordam va xayriya ishlari haqida ma’lumot berdi. 

Qayd etilishicha, aholining ijtimoiy himoyaga muhtoj qatlamlari, shu jumladan imkoniyati cheklangan shaxslarni moddiy qo‘llab-quvvatlash, ularga pul mablag‘i, kiyim-kechak, oziq-ovqat, zarur maishiy hamda tibbiy texniklar va boshqa turdagi xayriyalar uchun O‘zbekiston musulmonlari idorasi huzuridagi “Vaqf” xayriya jamoat fondi tomonidan joriy yilning o‘tgan davri mobaynida 1 milliard 76 million so‘mlik mablag‘ ajratilgan.

Shuningdek, moddiy yordamga muhtoj ammo, kasb-hunarga ega fuqarolar  uchun o‘tgan 2021-yilda “VAQF ko‘magi” loyihasi tashkil etilib, O‘zbekistonning 6 viloyatidan 200 dan ortiq fuqarolarga kasb-hunaridan kelib chiqib, qandolat pechi, tikuv mashinasi, chilangarlik va payvandlash uskunalari xayriya qilingan. 

Natijada 200 dan ortiq xonadon o‘z daromadiga ega bo‘lishni boshlagan. Mamlakatning olis va chekka hududlaridagi ichimlik suviga muhtoj 150 mingga yaqin aholi qatlami uchun 80 ga yaqin artezian quduqlari qazib chiqarilib, xayriya ishlari amalga oshirilgan. Mutaxassisning so‘zlariga ko‘ra, 2018-yildan ayni vaqtga qadar fond tomonidan imkoniyati cheklangan fuqarolar uchun 221 dona nogironlik aravachalari xayriya qilingan.

• O‘zbekiston musulmonlari idorasi
• Vaqf