Kremlda Vladimir Putinning Rossiyaga ishchi tashrifi bilan kelgan Belarus Respublikasi Prezidenti Aleksandr Lukashenko bilan uchrashuvi bo‘lib o‘tdi.

Rossiya Prezidenti Vladimir Putin belarus prezidenti Aleksandr Lukashenkoning Ukraina bilan Istanbulda kelishilgan kelishuvga qaytish taklifiga rozi bo‘ldi.

Belarus rahbari Lukashenkoning taʼkidlashicha, Istanbuldagi muzokaralar chog‘ida tomonlar “olg‘a siljish”ga erishgan, ammo keyinchalik kelishuvlar buzilgan. U Moskvaning urushni tinch yo‘l bilan tartibga solish tashabbuslari “Ukrainada javob topishiga” ishonch bildirdi va bu yo‘nalishda Putin bilan hamkorlik qilib, yelkama-yelka turishga tayyorligini aytdi.

“Bir paytlar menga ko‘rsatgan va topshirgan hujjatni olib, stolga qo‘yish va u bo‘yicha harakatlanish kerak”, — dedi Belarus rahbari.

“Ha va u bilan ishlash kerak”, — dedi Putin.
Lukashenko mazkur hujjatda “Ukraina uchun ham maqbul pozitsiya” aks etgani va ular bunga rozi bo‘lishganini aytdi.
“Ular rozi bo‘lishgan, albatta”, — deya qo‘shimcha qildi Putin.

Ukrainada urush boshlanganidan keyin Rossiya va Ukraina delegatsiyalari muzokaralarning bir necha raundini, jumladan, Istanbulda ham o‘tkazdi. Rossiya tomondan muzokarachilari rahbari, prezident yordamchisi Vladimir Medinskiy tomonlar muvaffaqiyatga erishganini aytdi.

“Kiyev boshqa narsalar qatorida xavfsizlik kafolatlari evaziga Ukrainaga neytral maqomini taklif qildi”, — dedi u.

Istanbuldagi uchrashuv 29-mart kuni bo‘lib o‘tgandi. Uning yakunlari bo‘yicha Rossiya delegatsiyasi rahbari Vladimir Medinskiy Ukraina “Rossiyaning fundamental talablarini bajarishga tayyorligini e’lon qilganini” aytgan. Talablar orasida Ukrainaning NATOga a’zo bo‘lishdan bosh tortishi va hududiga xorijiy harbiy bazalarni joylashtirmasligi ham bor edi.

• Belarus
• Erdogʻan
• Istanbul
• Kiyev
• Lukashenko
• Putin
• Rossiya
• Turkiya
• Ukraina
• Zelenskiy