Ingliz tilini ma’lum darajada bilasiz va sizga ingliz tilida gapiradigan suhbatdosh kerakmi? Quyida ingliz tilli suhbatdoshlar topishingiz va shu orqali so‘zlashuv ko‘nikmangizni rivojlantirishingiz mumkin bo‘lgan saytlarni tavsiya qilamiz.

1. Speaky.com

Bu saytdan telefon orqali ham, kompyuter orqali ham foydalanishingiz mumkin. Boshida barcha dastur va saytlarda bo‘lgani kabi ro‘yxatdan o‘tasiz. Facebook sahifangiz orqali osonlik bilan ro‘yxatdan o‘tishingiz mumkin. Xavotirga o‘rin yo‘q, dasturda faqat Facebook sahifangizdagi rasmingiz ko‘rinadi, xolos. Agar Facebook sahifangizni ko‘rsatishni istamasangiz o‘zingiz yangidan ro‘yxatdan o‘tishingiz mumkin. Bunda sayt sizga ona tilingiz, qaysi tillarni bilishingiz va qaysi tilni o‘rganishni istashingizni so‘raydi. Saytning o‘ziga xosliklaridan biri – ingliz tilini o‘rganishni tanlasangiz, sizga ona tili inglizcha va siz bilgan tillarni o‘rganishni istagan insonlar bilan do‘stlashishni tavsiya qiladi. Shu tariqa qarshingizdagi insonga ham til o‘rgatasiz va shu bilan birga undan til o‘rganasiz. Sizdan ugina, bizdan bugina deganidek. Bu saytning Play Market’da ham ilovalari mavjud.

2. HelloTalk.com

Bu sayt ham speaky kabi ishlaydi, lekin biroz farqli tomonlari bor. Qaydlar degan ajoyib bo‘limi bor. Siz unda o‘rgangan narsalaringiz va eslatmalaringizni qayd qilib qo‘yishingiz mumkin. Yana bir farqli tomoni, aytaylik, suhbatdoshingiz bilan ingliz tilida yozishmoqdasiz va gapda qaysidir so‘zni xato yozganingizda suhbatdoshingiz sizni xatoyingizni tuzatishi mumkin va tuzatilgan so‘z sizga osti chizilgan holda ko‘rinib turadi. Ushbu saytning ham ilovasi mavjud.

3. Interpals.net

Bu saytda yuqoridagilaridan farqli ravishda suhbatdoshni o‘zingiz tanlaysiz: faqat erkak yoki ayol, yosh chegaralari, faqat onlayn turganlar kabi tanlovlarni amalga oshirishingiz mumkin. 

4. Imvu.com

Bu sayt boshida sizga bir o‘yin saytidek tuyulishi mumkin. Ayniqsa, ijtimoiy tarmoqlarda rasmlari va shaxsiy ma’lumotlarini ulashishni xush ko‘rmaydiganlar uchun juda qulay sayt. Saytda ro‘yxatdan o‘tayotganingizda biror istalgan ism o‘ylab yozishingiz va rasm yuklash bo‘limida 3D tarzda o‘zingiz biror qiyofa yaratishingiz mumkin. Bu saytdan kompyuter orqali foydalanish tavsiya etiladi. Chunki mobil versiyasida kompyuter versiyasidagi kabi imkoniyatlaridan foydalanolmaysiz. Saytda xonalar bo‘limi mavjud. Qaysi tilda suhbatlashishni istasangiz, shu tilda suhbatlar bo‘layotgan xonani tanlaysiz. Va shu bilan birga, xonadagi suhbatdoshlar sonini ham istakga ko‘ra belgilashingiz mumkin.

5. Hellolingo.com

Bu saytning ishlash tizimi yuqoridagilariga o‘xshash. Va katta farqi ham bor: bu sayt sizdan ro‘yxatdan o‘tish davomida hech qanaqa rasm yuklashingizni so‘ramaydi. Shaxsiy ma‘lumotlar kiritish kabi shartlari ham yo‘q. Qolgan qismlari yuqorida ta’riflari berib o‘tilgan saytlar kabi: istagan tildagi bir xona tanlaysiz, guruh bo‘lib suhbatlashasiz va xohlasangiz birortasi bilan shaxsiy yozishmalar amalga oshirishingiz ham mumkin.

Yuqorida tavsiya etilgan saytlardan diqqat bilan foydalansangiz, albatta, foydasi tegadi. Faqat shaxsiy ma’lumotlarni kiritishda biroz diqqatli bo‘lish zarar qilmaydi.