10-avgust kuni Toshkent shahrida UNWTO va ICCA vakillari ishtirokida biznes uchrashuvlar sanoati (MICE-turizm) boʻyicha mahorat darsi boʻlib oʻtdi. Tadbir “Gastro Bazaar -2019” xalqaro gastronomik festivali doirasida tashkil etildi.

Xalqaro ekspertlar ishtirokidagi mahorat darsi Turizmni rivojlantirish davlat qoʻmitasi tashabbusi bilan oʻtkazildi. Treningdan maqsad – mamlakatimizda oʻtkazilayotgan xalqaro biznes tadbirlar darajasini oshirish boʻyicha dunyoning yetakchi mutaxassislari tajribasini oʻrganish, Oʻzbekistonning MICE-turizm salohiyatini oshirish va loyihalarni amalga oshirishdan tushadigan daromadlarni koʻpaytirish.

Mehmonxona xizmatini koʻrsatuvchi xoʻjalik sub’yektlari hamda turoperatorlardan iborat tadbir ishtirokchilari oʻz yoʻnalishida ICCA va  UNWTO akademiyasi vakillari tomonidan xalqaro darajali tadbirlarni oʻtkazish boʻyicha bepul taʼlim hamda zarur bilimlarni olish imkoniga ega boʻlishdi.

Mahorat darslari UNWTO Affillik dasturining doimiy vakili Dmitriy Ilin (Ispaniya), ICCA Yevropa mintaqaviy direktori Elif Balchi Fisinoglu (Turkiya) tomonidan oʻtildi. Turizmni rivojlantirish davlat qoʻmitasi huzuridagi “Ipak yoʻli” ofisi rahbari Mirtolib Mirzohidov tadbirga moderatorlik qildi.

UNWTO doimiy vakili Dmitriy Ilinning soʻzlariga koʻra, uchrashuvlar sanoati turizmning eng muhim segmentlaridan biri hisoblanadi, zero u iqtisodiyotga juda katta foyda keltiradi – mavsumiylik tushunchasini kamaytiradi, turistik yoʻnalishlarning yangilanishiga turtki beradi va umuman, innovatsiyalar va ijodiy yondashuvga ijobiy taʼsir koʻrsatadi.

“Biz UNWTOʻda ushbu mahorat darsi Oʻzbekistonda uchrashuvlar sanoatini rivojlantirish yoʻlidagi juda muhim hodisa deb hisoblaymiz. Chunki bu turizmning mazkur turi boʻyicha kadrlar malakasini oshirishdagi birinchi qadamdir”, - deya taʼkidladi u.

ICCA Yevropa mintaqaviy direktori Elif Balchi bu kabi tadbirlarning ahamiyatiga toʻxtaldi. 

“Bizning asosiy maqsadimiz - biznes uchrashuvlarni tashkil qilish boʻyicha davlat turistik tashkilotlari bilan tadbirkorlik sub’yektlari oʻrtasidagi hamkorlik aloqalarini kengaytirishdir. Oʻzbekiston uchun bu birinchi tajriba, bunday mahorat darslari mamlakat turistik biznesini yangi darajaga olib chiqadi”, - dedi Elif Balchi. 

Trening davomida ishtirokchilar MICE-turizm tushunchasi va uning asosiy tamoyillari, zamonaviy tendensiyalar hamda bu yoʻnalishdagi iqtisodiy koʻrsatkichlar bilan tanishishdi, shuningdek oʻzlarini qiziqtirgan savollarga xalqaro ekspertlardan tegishli javoblar olishdi.

Turkiya gastronomik turizm uyushmasi boshqaruv raisi Goʻrkan Boʻztepe tadbir doirasida MICE-turizmni rivojlantirishda gastronomik turizmning ahamiyatiga doir intervyu berdi:

“Bugun Gastronomik turizm festivali doirasida MICE-turizm mahorat darsi oʻtkazilmoqda. Taʼkidlash joizki, MICE-turizmni rivojlantirishda gastronomik turizm ham juda muhim. Nima uchun deysizmi? Chunki MICE-turizm maqsadida kelayotgan odamlar, asosan, yuksak didli va serdaromad odamlardir hamda ular oʻzlari xohlagan taomlardan tatib koʻrish uchun hamma narsaga tayyor. Bunday kishilar kelgan joyida ovqat yeyishi tabiiy va qayd etish lozimki, ularning baʼzilari hatto oilalari bilan ham kelishadi. Ular uchun milliy madaniyat va anʼanalarga mos muhitda ovqatlanish muhim ahamiyat kasb etadi. Shu jihatdan MICE-turizm va gastronomik turizm bir-biriga bogʻliqdir. Shunday ekan, bu kabi festivallarni oʻtkazish juda muhim”.