Karyera haqida gapiramizmi yo shaxsiy hayot haqidami, farqi yo‘q – birinchi taassurot juda muhim. U sizni odamlar qanday idrok qilishini belgilaydi. Birinchi taassurotning shakllanishiga ko‘p omillar ta’sir qildi. Bu borada psixologlar aniqlagan bir qancha muhim omillarga to‘xtalib o‘tamiz. 

Mutaxassislar uni “ingichka kesish” deb atashadi.

Inson miyasining kimgadir qarab lahzadayoq xulosa qilish qobiliyati mutaxassislar o‘rtasida “ingichka kesish”(ingl. thin slicing) deb ataladi. Bu qobiliyat – o‘zgacha narsa emas. U inson zotining tabiati asosi. Bunday tahlil har safar notanish odamga duch kelganimizda yoki umuman begona vaziyatda darhol qaror qabul qilishga majbur bo‘lganimizda sodir bo‘ladi. 

Ishonch o‘ninchi soniyada paydo bo‘ladi

Tadqiqot natijalariga ko‘ra, odamlar kimgadir ishonish mumkinmi-yo‘qmi – bu haqida 10-soniyada xulosaga keladilar. Prinstondagi tadqiqotchilar shunday xulosaga kelishdi. Ular bir guruh talabalarga ma’lum vaqt mobaynida aktyorlarning suratlari asosida turli sifatlar, jumladan, jozibadorlik, kompetentlilik hamda ishonish imkoniyatini baholash topshirig‘ini berishgan. Baholash yakunlangach, yana bir guruhga, aynan, shu sifatlarni aniqlash uchun cheklanmagan vaqt berilgan. 

Boshqa sifatlarni baholashga ketgan vaqt ikkala guruhda ham farq qilgan bo‘lsa-da, odamga ishonch darajasini aniqlashga ketgan vaqt ikki guruhda ham bir xil bo‘lgan. Ya’ni kimnidir uchratganingizda, siz hali gapirmasdan yoki qo‘lingizni uzatmasdan turib, boshqalar sizga ishonib bo‘ladimi-yo‘qmi – bu haqida xulosa qilib bo‘ladilar. 

Qo‘l siqish ko‘p narsa haqida ma’lumot beradi

Ilk taassurotning ijobiy shakllanishida, ayniqsa, u ish muhitida bo‘lsa, qo‘l siqish katta ahamiyatga ega bo‘ladi. Gap shundaki, qo‘l siqish sizni “ochiq”roq qiladi. Ishonchning bunday namoyon bo‘lishi boshqa odam bilan birlashishga yordam beradi.
 
“Turli sabablar bizning ijtimoiy aloqalarimizni buzilishiga olib kelishi mumkin, ammo qo‘l siqish salbiy taassurotni ancha yumshatishga yordam beradi”. 

Kiyim – muvaffaqiyat mezoni

Ko‘p sonli tadqiqotlarning aniqlashicha, sizning kiyimingiz muvaffaqiyatingizga to‘g‘ridan-to‘g‘ri ta’sir qiladi. 2011-yilgi tadqiqotga ko‘ra, yaxshi kiyingan erkaklar o‘z uslubiga ega bo‘lmagan erkaklardan ko‘ra o‘ziga to‘q hamda ijtimoiy maqomi yuqori tuyulishi aniqlangan. Bundan tashqari, boshqa bir tadqiqotda, kostyumni tayyor sotib olmasdan, buyurtmaga tiktiradiganlar aqlliroq va muvaffaqiyatliroq ko‘rinishi ma’lum bo‘lgan. 

Qanday taassurot uyg‘otayotganingizni aniqlang

Ko‘rib turganingizdek, birinchi taassurot mexanizmi haqida juda ko‘p foydali bilimlar bor. Inson miyasi bir necha soniyadayoq baho berish qobiliyatiga ega. Bu yodingizda tursin va boshqa odamlarda qanday taassurot uyg‘otishingizga e’tibor bering.