Ijtimoiy tarmoqlarda Andijon davlat tibbiyot intitutining xodimlari oylik maoshidan ularning “ixtiyoriy” mazmundagi arizalari asosida (keyinchalik aniqlanishicha, 200 nafardan ortiq xodimdan shu mazmundagi ariza ham olinmagan) 100-300 ming so‘mdan shanbalik uchun ushlab qolingani haqidagi xabar tarqaldi.

Mazkur holat yuzasidan ushbu OTM rahbariyati bergan rasmiy bayonotiga ko‘ra, Hukumatning 455-F-sonli qarori hamda viloyat hokimining 47-1-0-F/21-sonli farmoyishlari ijrosini ta’minlash maqsadida 21 avgust kuni bo‘lib o‘tgan umumxalq xayriya hashari munosabati bilan institutda mehnat qilayotgan barcha xodimlardan ixtiyoriy asosida bir kunlik ish haqi “Mahalla” hayriya jamoat fondining bankdagi hisob raqamlariga o‘tkazilishi belgilangan, ammo institut xodimlaridan birortasining ish haqidan olib qolingan emas. 
“Ijtimoiy tarmoqlarda tarqalgan bu xabar asossiz bo‘lib, feyk xabar hisoblanadi. Institutda biror xodim majburiy mehnatga jalb etilmaydi va ularning roziligisiz biror tadbir uchun oylik maoshlaridan ushlab qolinmaydi”, – deyiladi Andijon davlat tibbiyot intituti rahbariyati bergan munosabatda.

Adliya vazirligi Matbuot xizmati esa, ushbu holat Andijon viloyat adliya boshqarmasi tomonidan joyiga chiqqan holda o‘rganilgani va haqiqatda tashkilotning jami 743 nafar xodimi ish haqidan ushlab qolingani aniqlanganini bildirmoqda.

Ma’lum qilinishicha, mazkur OTM  rektorining 2021-yil 15-sentyabrdagi buyrug‘i bilan xodimlarning ish haqlaridan pul mablag‘larini ixtiyoriy ravishda shanbalik uchun ushlab qolish belgilangan.

Biroq, institut rektorining yuqoridagi buyrug‘iga asosan 743 nafar xodimlarning sentyabr oyi uchun oylik ish haqidan 100-300  ming so‘mdan jami 150 mln so‘m mablag‘lar avgust oyida o‘tkazilgan hashar munosabati bilan ushlab qolingan bo‘lib, shundan 221 nafar xodimning ish haqidan ularning roziligisiz pul mablag‘lari ushlab qolingan.

O‘rganish natijasida 150 mln so‘m pul mablag‘lari institut xodimlariga to‘liq qaytarilgan hamda qonunbuzilish holatlariga yo‘l qo‘ygan institutning mansabdor shaxslari intizomiy va ma’muriy javobgarlikka tortilgan.