Bugun, 28-sentyabr kuni O‘zbekiston va АQSh o‘rtasida taʼlim taraqqiyotiga ko‘maklashish bo‘yicha muhim kelishuv imzolandi. 

Hujjatni O‘zbekiston Respublikasi Xalq taʼlimi vaziri Sherzod Shermatov, АQSh elchixonasining muvaqqat vakili Аlan Meltsar va USAID ning Markaziy Osiyo mintaqaviy vakolatxonasi rahbari vazifasini bajaruvchisi Juli Sausfildlar imzoladilar.

Mazkur kelishuvga asosan, АQSh hukumati kelgusi besh yil davomida mamlakatimizga taʼlim sohasidagi islohotlarni qo‘llab-quvvatlash uchun 50 million AQSh dollarigacha mablag‘ ajratadi.

АQSh mazkur kelishuv doirasida O‘zbekistonda taʼlim islohotlarini qo‘llab-quvvatlash uchun ushbu mablag‘ning 19,5 million dollarga teng bo‘lgan birinchi qismini ajratdi.

Ta’kidlanishicha, mazkur ikki tomonlama kelishuv АQSh va O‘zbekiston hukumatlari o‘rtasidagi birinchi keng qamrovli grant shartnoma bo‘lib, u Аmerika Qo‘shma Shtatlarining yurtimiz taʼlim sohasidagi taraqqiyotini qo‘llab-quvvatlash borasidagi uzoq muddatli majburiyatini belgilaydi. Shuningdek, ushbu bitim asosida moliyalashtirilgan tadbirlar boshlang‘ich maktablarda o‘qish va matematikadan dars berish natijalarini yaxshilash, axborot texnologiyalaridan foydalanish hamda ingliz tilini o‘qitishda O‘zbekiston hukumati bilan yaqin hamkorlikda amalga oshiriladi.

Xususan, loyiha Xalq taʼlimi vazirligining o‘quvchilarning axborot texnologiyalari sohasida bilim va ko‘nikmalarini oshirishga qaratilgan “IT Nation” tashabbusini amalga oshirishda ilmiy asoslangan strategiya yaratishda ko‘mak beradi.

Taʼkidlash joizki, taʼlim sohasidagi muammolardan biri o‘quvchilarning bilim va ko‘nikmalarini obyektiv baholash vositalarining yo‘qligidir. USAID agentligi ko‘magida yurtimiz umumtaʼlim maktablarining boshlang‘ich sinflarida o‘qish va matematika (EGRA and EGMA) fanlari bo‘yicha tadqiqot ishlari olib boriladi. Ushbu tadqiqotlar o‘g‘il-qizlarning bilimidagi bo‘shliqlarni aniqlashga yordam beradi va ushbu muammolarni bartaraf etish choralarini ko‘radi. Mazkur loyihaga USAID qo‘shimcha 1,5 mln. AQSh dollari ajratadi.

Shuningdek, USAID agentligi mazkur loyiha davomida Xalq taʼlimi vazirligiga zamonaviy taʼlim usullarini joriy etish yo‘llari bilan bir qatorda mamlakatimiz maktablarida ingliz tilini o‘qitishni takomillashtirishga qaratilgan “English speaking nation” dasturini amalga oshirishda yordam beradi. АQShlik hamkorlar bu loyihani amalga oshirish uchun yana 5 mln. AQSh dollari taqdim etadi.

Eslatib o‘tamiz, 2019-yilning may oyida O‘zbekiston Respublikasi Xalq taʼlimi tizimini 2030-yilgacha rivojlantirish konsepsiyasi qabul qilingan edi. Mazkur loyiha konsepsiyada nazarda tutilgan maqsadlarni amalga oshirishga yordam beradi.