Har yili Los-Anjyeles avtosaloni doirasida avtomobil kompaniyalari dizaynerlari o‘rtasida tanlov o‘tkaziladi. 2012 yili ularga kelajakdagi politsiya mashinasini o‘ylab topish taklif qilingandi. O‘tgan yili tabiat bilan uyg‘un transport vositalari borasida tanlov o‘tkazilgandi. Bu yil esa dizaynerlarga quyidagi shart qo‘yildi: “Inson va mashinaning 2029 yilda o‘zaro mutanosibligi”.

Amerikaning “Akura” dizayn-byurosi insonning mashina bilan “birlashib” ketadigan konseptini o‘ylab topishdi.

Mashina ikkita — “interer” va “eksterer” modullaridan iborat bo‘lib, ular to‘rli tizim orqali birlashgan.

Terisi ostiga mikrochip o‘rnatilgan haydovchi maxsus matritsaga teginib, kuzovning ayrim unsurlarini o‘zgartirishi, salonni kengaytirishi yoki toraytirishi mumkin.

Ushbu loyiha g‘oliblikni qo‘lga kirita olmadi. Chunki uning mualliflari bularning barchasi qanday ishlashini tushuntirib bera olishmadi.

Amerikaning “Peterbilt” yuk mashinalari ishlab chiqarish korxonasi haydovchisiz furani taqdim etdi.

Loyiha “SymbiotUX” (“simbioz” va “UX”, “foydalanuvchi uyg‘unligi”) deb nomlandi. Uning o‘ziga xosligi shundaki, o‘rindiqlar “NanoHedron” deb nomlanuvchi sensor qoplama bilan jihozlangan.

O‘rindiqlar yo‘lovchining ehtiyojini “his qila oladi” (masalan musiqa ovozini pasaytirish), charchoqni nazorat qiladi va golografiya yordamida kompyuter o‘yinlarini ishga tushiradi.

“Simbiotiks”lar yagona safga birlashishlari mumkin. Bu holda eng oldindagi fura haydovchisi safni boshqaradi. Qolgan mashinalarning haydovchilari uxlashlari yoki kompyuter o‘yinlari o‘ynab ketishlari mumkin. 

Xitoy-Isroil “Qoros” korxonasi “Q: QorosQloud Qubed” avtomobilini yaratdi. 

Mashinaga o‘rnatilgan “Q” superkompyuteri yordamida tizim haydovchining odatlarini eslab qoladi, avtopilot vazifasini ham bajara oladi. Haydovchi o‘rindig‘i o‘rtada joylashgan bo‘lib, vaziyatga qarab orqaga burilishi ham mumkin.

Egasining holatiga qarab mashina o‘z vazifasini bajaradi. Masalan, “Kvoros” juma kuni kechqurun egasining charchaganligini his qilsa, boshqaruv avtopilotga o‘tadi. Haydovchi esa bemalol uxlashi mumkin bo‘ladi.

Vazifalarga kirishish golografik proyektor yordamida boshqariladi. Haydovchining kayfiyatiga qarab salon ichida turli rangdagi chiroqlar yonadi.

Bundan tashqari, mashinaning o‘zi ham chiroqlari yordamida batareya quvvati tugayotganligidan “xafa” bo‘layotganini bildirishi mumkin.

Mashina ikkita farzandi bor oilalarga mo‘ljallangan.

“Synaptiq” deb nom olgan “Infiniti” konsepti tomoshabinlar olqishiga sazovor bo‘ldi. U kelajak avtosporti uchun mo‘ljallangan ekzokostyumli sport avtomobilidir.

Mualliflar kompaniya 2029 yilda A.R.C. (Air, Rally, Circuit) avtopoygasida ishtirok etishlarini tasavvur qildilar. Bu poyga trek, kesishgan yo‘llar va havoda o‘tkaziluvchi triatlondir.

Mashina samolyot yoki bolidga aylanishi mumkin. Aniqrog‘i, u yoki bu turdagi kuzovga ulanishi mumkin.

 Haydovchi ko‘chib yuruvchi kapsula ichida joylashadi. Haydovchi o‘rindig‘iga ekzokostyum ulanadi.

Kapsulada turli ma'lumotlar beriluvchi ko‘plab golografik va suyuq kristalli displeylar mavjud.

Agar uchgingiz kelsa, mashinangizni samolyotga aylantirasiz.

Va uchib ketasiz.

Tanlov g‘olibi — “Xonda”ning “CARpet” deb nomlangan “gilamli” loyihasi. Mashinaga solinadigan gilam ostida sun'iy “muskullar” bo‘ladi.

Haydovchining istagiga qarab “muskullar” gilam shaklini o‘zgartiradi. Haydovchi o‘rindig‘ining ham keragi yo‘q — uni “yasab” olish mumkin.

Boshqaruv “Xonda-shar” — istagancha aylantirish mumkin bo‘lgan shaffof shar yordamida amalga oshiriladi.

Mualliflarning fikricha, bunday tizim insonga o‘zini to‘liq erkin his qilish imkonini beradi.

Tasavvur qiling: 2029 yilda mashinalarda o‘rindiqlar bo‘lmaydi, biz avtomobil ichida istagandek harakat qilishimiz mumkin.

Manba: motor.ru